Anganewadi Jatra 2026 Special Trains:कोकणची काशी समजल्या जाणाऱ्या आंगणेवाडी येथील भराडी देवीच्या यात्रेसाठी मुंबईहून येणाऱ्या चाकरमान्यांची आणि भाविकांची गर्दी आता रेल्वेच्या रूळावर धावणार आहे. प्रवाशांची अतिरिक्त गर्दी लक्षात घेऊन कोकण रेल्वेने ७ ते १० फेब्रुवारीदरम्यान लोकमान्य टिळक टर्मिनस आणि मडगावदरम्यान विशेष साप्ताहिक गाड्या चालवण्याचा निर्णय घेतला आहे. कोकण रेल्वेचे मुख्य जनसंपर्क अधिकारी सुनील नारकर यांनी या विशेष गाड्यांच्या नियोजनाची माहिती दिली.
असे असेल विशेष गाड्यांचे वेळापत्रक
गाडी क्रमांक ०१००४ मडगाव - लोकमान्य टिळक टर्मिनस विशेष गाडी दि. ७ आणि ९ फेब्रुवारी रोजी मडगाव येथून दुपारी ४:३० वाजता सुटेल आणि दुसऱ्या दिवशी सकाळी ५:५० वाजता मुंबईत पोहोचेल. परतीच्या प्रवासासाठी गाडी क्रमांक ०१००३ लोकमान्य टिळक टर्मिनस - मडगाव विशेष गाडी दि. ८ आणि १० फेब्रुवारी रोजी सकाळी ७:५५ वाजता मुंबईहून सुटेल आणि त्याच दिवशी रात्री १०:०० वाजता मडगावला पोहोचेल.
आरक्षणासाठी उडाली झुंबड
या विशेष गाड्यांचे बुकिंग ४ फेब्रुवारी २०२६ पासून सर्व आरक्षण केंद्रांवर आणि आयआरसीटीसीच्या संकेतस्थळावर सुरू होणार आहे. या गाडीला एकूण २२ डबे असून, प्रवाशांच्या सोयीसाठी २० स्लीपर डबे जोडण्यात आले आहेत. आंगणेवाडी यात्रेच्या काळात नियमित गाड्यांचे आरक्षण महिनाभरापूर्वीच फुल झाल्याने, या विशेष गाड्यांमुळे हजारो भाविकांना मोठा दिलासा मिळणार आहे.
वाचा : ‘आंगणेवाडी’ सजली; बाजारपेठ फुलली, देवीच्या दर्शनासाठी यंदा खास नियोजन
प्रवासाचा मार्ग आणि प्रमुख थांबे
मुंबई ते मडगावदरम्यान धावणाऱ्या या गाड्यांना कोकणातील महत्त्वाच्या स्थानकांवर थांबा देण्यात आला आहे.
सिंधुदुर्ग जिल्हा : सावंतवाडी रोड, कुडाळ, सिंधुदुर्ग स्थानक, कणकवली, वैभववाडी रोड.
इतर प्रमुख थांबे : राजापूर रोड, रत्नागिरी, चिपळूण, खेड, माणगाव, पनवेल आणि ठाणे.
एका नजरेत रेल्वे फेऱ्या (फेब्रुवारी २०२६)
गाडी क्रमांक - कुठून-कुठे- तारीख - वेळ
०१००४ - मडगाव ते मुंबई - ७ व ९ फेब्रु. - दु. ४:३० वा.
०१००३ - मुंबई ते मडगाव - ८ व १० फेब्रु. - स. ७:५५ वा.
नोंद बुकिंग ४ फेब्रुवारीपासून सुरू