उंब्रज ग्रामपंचायत निवडणुकीत १७ जागांपैकी राष्ट्रवादी, राष्ट्रीय काँग्रेस पुरस्कृत सह्याद्री उंब्रज विकास आघाडीने १३ जागा मिळवून बहुमत मिळवले होते. राष्ट्रवादीच्या दुसऱ्या गटातील भैरवनाथ जनविकास परीवर्तन पॅनलला २ जागा मिळाल्या होत्या. भाजप पुरस्कृत भैरवनाथ ग्रामविकास पॅनलने २ जागा जिंकल्या. सरपंचपदाचे आरक्षण निवडणुकीनंतर सर्वसाधारण पुरुष प्रवर्गासाठी जाहीर झाले. उंब्रजच्या सरपंचपदाची माळ कोणाच्या गळ्यात पडणार, याकडे सर्व उंब्रजकरांचे लक्ष लागले होते. ८ फेब्रुवारीला सरपंचपदाची निवड उच्च न्यायालयाच्या आदेशानुसार १६ फेब्रुवारीपर्यंत स्थगित करण्यात आली होती. त्यानंतर २३ फेब्रुवारीला निवडणूक घेण्याचे आदेश तहसीलदारांनी दिले. सोमवारी सरपंच व उपसरपंचपदाची निवड झाली.
सह्याद्री उंब्रज विकास आघाडीच्या वतीने योगराज जाधव यांनी सरपंचपदासाठी अर्ज भरला, तर याच आघाडीतील सुधाकर जाधव यांनीही सरपंचपदासाठी अर्ज भरला. उपसरपंचपदासाठी सुनंदा जाधव यांचा एकमेव अर्ज दाखल झाला. त्यामुळे उपसरपंचपदाची निवड बिनविरोध झाली. मात्र सरपंचपदासाठी दोन अर्ज दाखल झाल्यामुळे मतदान घेण्याची सूचना सर्व सदस्यांनी अध्यासी अधिकारी विकास शिंदे यांना केली.
सरपंचपदासाठी झालेल्या मतदानामध्ये योगराज जाधव यांना सतरापैकी पंधरा मते मिळाली. सुधाकर जाधव यांना दोन मते मिळाली. त्यामुळे योगराज जाधव यांना सरपंच म्हणून विजयी घोषित करण्यात आले. निवडणूक अध्यासी अधिकारी म्हणून विकास शिंदे, सहायक अध्यासी अधिकारी संदीप काळे, सचिव म्हणून ग्रामविकास अधिकारी व्ही. एम. चव्हाण यांनी काम पाहिले.
फोटो : २४योगराज जाधव
फोटो : २४सुनंदा जाधव