सातारा: जिल्ह्यात कोरोनाबाधितांचे मृत्यूसत्र सुरूच असून सोमवारी आणखी दोघांचा कोरोनामुळे मृत्यू झाला. यामुळे बळींची संख्या १ हजार ८०३ वर पोहोचली आहे. तसेच रात्री नवे ३३ रुग्ण आढळून आले असून बाधितांचा आकडा ५५ हजार २६४ एवढा झाला आहे.
जिल्ह्यात बाधितांच्या मृत्यूचे प्रमाण अधूनमधून सुरूच असून सोमवारी दोघांचा मृत्यू झाला. मृतांमध्ये सोनके, (ता. कोरेगाव) येथील ७६ वर्षीय पुरुष, लोधवडे, (ता. माण) येथील ६२ वर्षीय पुरुषाचा समावेश आहे.
दरम्यान, जिल्ह्यात शनिवारी रात्री ५९ जणांचे अहवाल बाधित आले होते. यामध्येही दोघा बाधितांचा मृत्यू झाला होता.
जिल्ह्यात कोरोनामुक्तीचेही प्रमाण वाढले असून सोमवारी दिवसभरात ३० जण तर आतापर्यंत ५२ हजार ६१४ नागरिकांनी कोरोनावर यशस्वी मात केली आहे. तसेच सोमवारी २७९ जणांचे नमुने तपासणीसाठी पाठविण्यात आले आहेत. त्याचबरोबर रुग्णालयात तपासणीसाठी गर्दीही वाढत आहे.