दक्षिण तांबवेत ५१ युवकांनी केले रक्तदान
तांबवे : दक्षिण तांबवे, ता. कऱ्हाड येथील छत्रपती शिवाजी महाराज युवा विचार मंचतर्फे रक्तदान शिबिर आयोजित करण्यात आले होते. महालक्ष्मी ब्लड बँकेने शिबिराला सहकार्य केले. या शिबिरात युवकांनी मोठ्या संख्येने रक्तदान केले. सायंकाळपर्यंत ५१ युवकांनी रक्तदान केले. शिबिराच्या यशस्वितेसाठी महेश शिंदे, किरण झोंबाडे, अक्षय बाबर, सचिन भिसे, संतोष शेळके यांनी परिश्रम घेतले.
रेठरे बुद्रुकमध्ये स्वामी समर्थ सेवा केंद्र सुरू
कऱ्हाड : स्वामी समर्थ सेवा व आध्यात्मिक विकास केंद्राचे रेठरे बु., ता. कऱ्हाड येथे साप्ताहिक विकास केंद्र सुरू करण्यात आले आहे. दर रविवारी दुपारी दोन ते पाच या वेळेत भक्तांच्या अडचणी जाणून घेऊन मार्गदर्शन केले जाणार आहे. अधिक माहितीसाठी बाळासाहेब मोहिते, रंगराव मोहिते, धनंजय मोहिते, अतुल मोहिते यांच्याशी भाविकांनी संपर्क साधावा. महिला भाविकांनी सुवर्णा मोहिते यांच्याशी संपर्क साधावा, असे आवाहन करण्यात आले आहे.
कार्वे विभागामध्ये ऊसतोडींना आला वेग
कार्वे : शेरे, दुशेरे, कोरेगाव विभागातील ऊसतोडणीने वेग घेतला आहे. अनेक ठिकाणी मजुरांनी आपल्या झोपड्या घातल्या आहेत. पहाट होताच हे मजूर शिवाराचा रस्ता धरत आहेत. तसेच दिवसभर ऊसतोड करत थंडीमुळे ऊसतोड करून रात्री लवकर परतत आहेत. शिवारात ऊस तोडीची लगबग सुरू असल्यामुळे शेतकरीही सकाळी लवकर शिवारात जात असून पुढील हंगामासाठी शेतीची मशागत करण्यात ते व्यस्त असल्याचे चित्र ग्रामीण भागात दिसत आहे.