Satara: खड्डेमय रस्त्यामुळे ट्रकचालकाने अचानक ब्रेक लावला, पाठीमागील दोन ट्रक धडकले; अडकलेल्या चालकाची आठ तासांनंतर सुटका

अचानक ब्रेक लावल्याने पाठीमागील दोन ट्रक मागून धडकले

कोयनानगर : कराड-चिपळूण महामार्गावरील तामकडे एमआयडीसीजवळ शुक्रवारी सकाळी साडेअकरा वाजण्याच्या सुमारास तीन वाहनांची भीषण साखळी धडक झाली. या अपघातात एका ट्रकचा चालक आत अडकून पडला होता. तब्बल आठ तासांच्या अखंड बचावकार्यानंतर त्याला बाहेर काढण्यात यश आले.

याबाबत अपघातस्थळावरून मिळालेल्या माहितीनुसार, कराड-चिपळूण महामार्गावर रात्री साडेअकरा वाजता तामकडे गावाचा हद्दीत कोयनानगरच्या दिशेने जाणाऱ्या वाहन नवीन रस्ता असल्याने वेगाने धावत असताना पुढे कच्चा व खड्डेमय रस्ता सुरू झाला आहे. यामुळे पुढच्या ट्रकचालकाने अचानक ब्रेक लावल्याने पाठीमागील दोन ट्रक मागून धडकले. यामध्ये सर्वात शेवटचा ट्रक (केए ३२ एबी ५३९६) पुढचा ट्रकवर जोरदार धडकला. यामुळे त्याचा दर्शनी भाग पूर्णपणे चेपून गेला. यामध्ये ट्रक चालकाचे पाय अडकल्याने तो अडकून पडला होता.

अपघाताची माहिती मिळताच पाटण पोलिस ठाण्याचे सहायक पोलिस निरीक्षक व पोलिस कर्मचारी इतर वाहन चालक तसेच स्थानिक नागरिकांनी मिळून बचाव कार्य सुरू केले. कडाक्याच्या थंडीतही जनरेटर, वेल्डिंग कटर, गॅस कटर आणि जेसीबीच्या साह्याने ट्रकचा चेपलेला पुढील भाग तोडत चालकापर्यंत पोहोचण्याचा प्रयत्न करण्यात आला. सुमारे आठ तासांच्या प्रयत्नांनंतर चालकाची सुटका करण्यात आली. त्यानंतर पुढील उपचारासाठी ग्रामीण रुग्णालयात पाटण येथे दाखल करण्यात आले. या अपघाताची सायंकाळपर्यंत नोंद झाली नव्हती.

उपाययोजनेची गरज

रस्त्याचे काम सुरू असताना अनेक छोटे-मोठे अपघात होत आहे. तरी महामार्ग विभागाने ठेकेदाराकडून काम सुरू असलेल्या सर्व ठिकाणी सुरक्षेच्या दृष्टीने उपाययोजना करून ‘सिंगल लाइन’ माहिती सूचना फलक, स्पीड कंट्रोल बोर्ड, ब्लिंकर्स यांची तातडीने व्यवस्था करावी.