पुसेगाव : उत्तर खटाव तालुक्यातील मोळ, डिस्कळ बुध, पुसेगाव परिसरात गेल्या दोन आठवड्यांत वादळी वाऱ्यासह झालेल्या पावसाने शेतीच्या कामांना वेग आला आहे. वातावरणात चांगलाच गारवा निर्माण झाल्याने शेतकऱ्यांनी आले लागवड उरकत आणली आहे. मात्र, गतवर्षी लावलेल्या आल्याच्या खोडवा पिकाचा दर दिवसेंदिवस ढासळत असल्याने शेतकऱ्यांमध्ये चिंतेचे वातावरण आहे.
बटाटा बियाणे तसचे बटाटा उत्पादनाची पुसेगाव ही मुख्य बाजारपेठ असून, गेल्या आठ-दहा वर्षांत या परिसरात आले या प्रचंड भांडवली पिकाची लागवड मोठ्या प्रमाणावर होत आहे. यावर्षी आले पिकाला दर नसल्याने बियाणेही स्वस्तात मिळाले. गेल्यावर्षी सुमारे ३२ हजार ५०० रुपये प्रतिगाडी (म्हणजे ५ क्विंटल) अशा दराने मिळणारे आले बियाणे यावर्षी प्रतिगाडी केवळ सात ते आठ हजार रुपयांत मिळाले. मात्र, कोरोनाच्या पार्श्वभूमीवर यावेळी आल्याची कमी प्रमाणात लागवड झाल्याचे दिसून येत आहे. सातत्याने लॉकडाऊन राहिल्याने शेतकऱ्यांना आपला शेतीमाल विकता आला नाही. त्यामुळे शेतकऱ्यांना आर्थिक अडचणींना सामोरे जावे लागत आहे. जरी बियाणे कमी दराने मिळत असले तरी रासायनिकबरोबरच सेंद्रिय खतांच्या वाढलेल्या किमती, मजुरांनी वाढवलेले दर यामुळे शेतकऱ्यांना आले लागवडीसाठी कसरत करावी लागत आहे.
गतवर्षी लागवड केलेल्या आल्याला (दिडीचे आले) यंदाही कोरोनाच्या संकटाने ग्रासले आहे. लाखो रुपये खर्च करून केवळ दहा ते बारा हजार रुपये शेतकऱ्यांच्या हातात पडत आहेत. कोरोनामुळे प्रमुख बाजारपेठा बंद असल्याने व्यापारी आले खरेदीसाठी नाखूश आहेत. त्यातही जर दर पाडून मागणी केली आणि एखाद्या शेतकऱ्याने दिडीचे आले काढले तर त्यात प्रतवारी केल्याने शेतकऱ्यांना खर्च केलेली रक्कम परत मिळत नाही, अशी अवस्था झाली आहे.
चाैकट..
दीड वर्षांपासून दरात घसरण...
सध्या एका गाडीचा (५०० किलो) खरेदी दर केवळ चार ते पाच हजार रुपये आहे. कोरोनाच्या पार्श्वभूमीवर वेळोवेळी लॉकडाऊन जाहीर केल्यामुळे गेल्या दीड वर्षांपासून आल्याच्या दरात घसरण होत आहे.
पुढील वर्षापर्यंत कोरोनाचे संकट कमी होऊन बाजारपेठा सुरळीत झाल्यास आल्याची मागणी वाढेल व दरातही चांगली सुधारणा होईल, या एकाच आशेवर शेतकऱ्यांनी पुसेगावसह परिसरामध्ये आल्याची लागवड केली आहे.
०२ पुसेगाव
फोटो-
पुसेगाव परिसरात आले पिकाची मोठ्या प्रमाणात लागवड करण्यात येत आहे. (छाया : केशव जाधव)