कऱ्हाड : पालिकेच्या नागरी आरोग्य केंद्राच्या वतीने ज्येष्ठ नागरिकांसह महिलांची, बाजारपेठेत बसणाऱ्या भाजी विक्रेत्यांचीही आरोग्य तपासणी नुकतीच करण्यात आली आहे. पालिकेच्या वतीने शहरातील सार्वजनिक रस्ते, दुभाजक, पादचारी मार्गावर अग्निशमन बंबाच्या साह्याने वेळोवेळी औषध फवारणी तसेच पाणी मारून स्वच्छता केली जात आहे. तसेच ज्याठिकाणी कचरा साचतो तो परिसरही पालिकेकडून स्वच्छ केला जात आहे.
श्वानांची दहशत (फोटो : २४इन्फोबॉक्स०२) कऱ्हाड : तालुक्यातील विंग व परिसरात मोठ्या प्रमाणात मोकाट श्वानांची दहशत वाढली आहे. श्वानांची संख्या जास्त असून, ते रात्रीच्यावेळी दुचाकी चालकांवर हल्ला करत आहेत. अचानक गाडीवर हल्ला केल्याने अपघात होत आहेत. श्वानांचा बंदोबस्त करण्याची मागणी होत आहे.
पालिकेचा वॉच
कऱ्हाड : कऱ्हाड शहरात उघड्यावर कचरा टाकल्यास दंड केला जात आहे. पालिका प्रशासनाने कारवाईसाठी एक पथकही स्थापन केले आहे. या पथकातील अधिकारी तसेच कर्मचाऱ्यांकडून कचरा टाकणाऱ्यांवर वॉच ठेवला जात आहे. संबंधितांना पकडून त्यांना दंडही केला जात आहे.
मल्हारपेठला गर्दी
मल्हारपेठ : मल्हारपेठ ही पाटण तालुक्यातील महत्त्वाची बाजारपेठ आहे. याठिकाणी कपडे तसेच सोन्या-चांदीची दुकाने मोठ्या प्रमाणावर आहेत. सध्या विवाह समारंभ सुरू असून त्याच्या खरेदीसाठी विभागातील अनेक गावांतील ग्रामस्थ बाजारपेठेत गर्दी करीत आहेत. ग्राहकांच्या गर्दीमुळे बाजारपेठ गजबजल्याचे दिसून येत आहे.
नाल्यांची दुरवस्था
कऱ्हाड : पुणे -बंगळुरु राष्ट्रीय महामार्गानजीकच्या गटाराची सध्या मोठ्या प्रमाणात दुरवस्था झाली आहे. या नाल्यामध्ये कचरा साचून राहिल्यामुळे त्यातील पाणी व कचरा महामार्गालगतच्या उपमार्गावर येऊन पडत आहे. त्यामुळे परिसरात दुर्गंधी पसरत आहे. मलकापूर, नांदलापूर, पाचवड फाटा, आटके, नारायणवाडी, वाठार, मालखेड अशा ठिकाणी गटारात कचरा साचत आहे.