साताऱ्याच्या रस्त्यावर पाच हजार धावपटू

सातारा हिल मॅरेथॉन स्पर्धा : इथिओपियाच्या टॅमार्ट गुडेटा, जेफ्री मारिया यांची बाजी; ४८ आंतरराष्ट्रीय स्पर्धकांचा सहभाग

सातारा : सातारा हिल मॅरेथॉन स्पर्धेत अतिशय वेगाने धावत परदेशी धावपटूंच्या गटात इथिओपियाच्या टॅमार्ट गुडेटा याने २१ किलोमीटरचे अंतर केवळ एक तास, आठ मिनिटे, दोन सेकंदात पार करीत साताऱ्यातील आंतरराष्ट्रीय दर्जाच्या तिसऱ्या सातारा हिल मॅरेथॉन स्पर्धेचे विजेतेपद मिळविले. महिलांच्या अर्ध मॅरेथॉनमध्ये परदेशी विभागाच्या गटात इथिओपियाच्याच जेफ्री मारिया या महिलेने एक तास दहा मिनिटे आणि तीस सेकंदात अंतर पार करून महिला गटाचे विजतेपद मिळविले.सातारा मॅरेथॉन असोसिएशन आयोजित व महाराष्ट्र राज्य व सातारा जिल्हा अ‍ॅमॅच्युअर अ‍ॅथलेटिक्स असोसिएशन यांच्या मान्यतेने हिल मॅरेथॉन स्पर्धेला देशभरातून प्रतिसाद मिळाला. स्पर्धेत ५ हजार २०० हून अधिक स्पर्धकांनी सहभाग घेतला. ४८ आंतरराष्ट्रीय स्पर्धकांनी उपस्थिती लावली होती. २१ किलोमीटर पुरुष गटात युनुस असफाने एक तास आठ मिनिटे २५ सेकंदात द्वितीय तर टिसेराय अ‍ॅडगुना याने एक तास आठ मिनिटे ३६ सेकंदात तृतीय क्रमांक मिळविला. परदेशी महिला गटात २१ किलोमीटरसाठी इथिओपियाच्या जेफ्री मारियाने प्रथम, केनियाच्या सिफ्रॉ रेटसने द्वितीय तर इथिओपियाच्या तारुल ग्लेसने तृतीय क्रमांक मिळविला. भारतीय २१ किलोमीटर पुरुष गटात विनोद कुमार एक तास १४ मिनिटे २२ सेकंद, तानाजी नलावडे एक तास १५ मिनिटे ३७ सेकंद, ज्ञानेश्वर मोरया एक तास १५ मिनिटे ३९ सेकंदात अंतर पूर्ण करून विजेते ठरले. भारतीय २१ किलोमीटर महिला गटात नीलम रजपूत, रेशम सिंग, स्रेहल गाला हे विजेते ठरले. २१ किलोमीटर ज्येष्ठ पुरुष गटात पांडुरंग चौगुले, अशोक नाथ, उदय महाजन हे विजेते ठरले. तर २१ किलोमीटर महिला गटात वैशाली कस्तुरे, प्रतिमा हेबळे, एस. जी राधाकृष्णन या विजेत्या ठरल्या. हाफ मॅरेथॉनच्या सिनिअर सिटीझन पुरुष गटात केरबा गुरव, सुरेश पिल्लई, रावसाहेब सूर्यवंशी विजेते ठरले. २१ किलोमीटर ज्येष्ठ महिला गटात चित्रा नाडकर्णी, खुर्शिद मिस्त्री, दुर्गा सुनील हे विजेते ठरले. अतिज्येष्ठ २१ किलोमीटर पुरुष गटात पंकज देसाई, व्ही. रामचंद्र राव, जयंत नवरंग हे विजेते ठरले. हाफ मॅरेथॉनच्या सिनिअर सिटीझन महिला गटात मीता रामकृष्णन विजेत्या ठरल्या. विजेत्यांचा गौरव सन्मानपदक, रोख रक्कम व स्मृतिचिन्हे देऊन करण्यात आला. स्पर्धा समिती प्रमुख डॉ. संदीप काटे यांनी स्वागत केले. एम. सी. चैतन्य यांनी सूत्रसंचालन केले. डॉ. प्रतापराव गोळे यांनी आभार मानले. (प्रतिनिधी) पहिले बक्षीस सव्वा लाखांचे... जिल्हा पोलीस परेड ग्राउंडवरून खासदार उदयनराजे भोसले, आमदार शिवेंद्रसिंहराजे भोसले, गजेंद्र पवार, अजित मुथा यांनी विविध गटांच्या या स्पर्धेला झेंडा दाखवून प्रारंभ केला. यामध्ये २१ किलोमीटर, दहा किलोमीटर व पाच किलोमीटर अशा तीन विभागांत ही स्पर्धा झाली. विविध गटांमध्ये मिळून स्पर्धेमधील विजेत्यांना एकूण दहा लाख रुपयांच्या बक्षिसांचे वितरण करण्यात आले. यात पहिले बक्षीस एक लाख २५ हजार रुपयाांचे होते.