म्हसवड : सुमारे दीडशे वर्षांपूर्वीपासून कब्जे वहिवाटीत व स्वत: कसत असलेल्या कूळ शेतकऱ्यांची मालक नावे व आणेवारी नोंद केलेला सातबारा त्यांच्या हाती दिला जात नाही, तोपर्यंत शेतकरी प्रांत कार्यालयासमोरील ठिय्या आंदोलन थांबविणार नाहीत,’ असा इशारा डॉ. भारत पाटणकर निवेदनाद्वारे दिला आहे.
श्रमिक मुक्ती दलाच्यावतीने दहिवडी येथील प्रांत कार्यालयासमोर सुरू असलेले म्हसवड परिसर कूळ हक्क शेतकरी आंदोलन दि. ११ फेब्रुवारीपासून सुरू आहे. आंदोलनाबाबत वेळोवेळी निवेदनेही दिली; परंतु सरकारकडून ठोस निर्णय घेतला नसल्यामुळे राज्यात ४४ ठिकाणी सुरू असलेल्या आंदोलकांना दहिवडी येथील आंदोलनात सहभागी करून मोठा लढा दिला जाईल, असा इशाराही निवेदनात दिला आहे.
येथील सरंजामाची हजारो शेतकऱ्यांच्या सातबारावर जी बेकायदेशीररीत्या सरकारने नावे ठेवलेली आहेत, ती कायमस्वरूपी काढून टाकावीत व हजारोंच्या संख्येने असलेल्या कुळांचीच मालकी हक्काची १६ आणे आणेवारी नोंद केलेला संगणकीय सातबारा म्हसवड परिसरातील आंदोलक शेतकरी बांधवाच्या हाती द्यावा.
सन २०१६ डिसेंबरपासून सर्व शासकीय कामाकरिता संगणकीय सातबारा वापराचे आदेश सरकारने जारी करून पारंपरिक पुस्तकी सातबारा वापरावर बंदी लागल्यामुळे येथील संबंधित शेतकरीबांधव अडचणीत आले आहेत. वर्षानुवर्षे जमीन कसत असलेल्या शेतकरी कुटुंबांचे जमिनीच्या सातबारा सदरी निरंतर, संरक्षित व इतर हक्कातील कुळांच्या रेषेवर बेकायदेशीररीत्या सरंजामशाहांची सरकारने अस्तित्वात ठेवलेली पोकळ व बोगस नावे नोंद ठेवून तब्बल आण्याचा सरकारनेच केलेला सातबारा कुळांच्या मालकी हक्काचा नावे १६ आणे करून जोपर्यंत सरकार हाती देत नाहीत, तोपर्यंत शेतकरी बांधवांचे कुटुंबांसमवेत ठिय्या आंदोलन सुरूच राहणार आहे.
(चौकट)
चुका सरकारनेच दुरुस्ती कराव्यात...
‘कसेल त्याची जमीन, कूळ कायदा, कमाल जमीन धारणा आदी सरकारने कायदे वेळोवेळी केले. राज्यात त्याची ज्याच्या त्यावेळी अंमलबजावणीही झाली. म्हसवड भागात मात्र सरकारने दुर्लक्षच केले. म्हसवड भागातील हजारो गोरगरीब शेतकरी कुटुंबे दीडशे वर्षांपूर्वीपासून स्वत: कसत असलेल्या शेतजमिनीच्या सातबारा उताऱ्यावर बेकायदेशीर सरंजामाची पोकळ ठेवलेली नावे ही चूक सरकारचीच आहे. त्यापुढे वरचेवर केलेल्या चुका सरकारनेच दुरुस्त करणे गरजेचे आहे.
20दहिवडी
फोटो : दहिवडी येथील प्रांत कार्यालयासमोर बेमुदत ठिय्या आंदोलनात म्हसवड परिसरातील शेतकरी सहभागी झाले आहेत.