मृत्यूला कवटाळतानाही वाचविले इतरांचे प्राण

साखरवाडी : प्रल्हादराव साळुंखे-पाटील यांच्या चालकाने अखेरच्या क्षणीही दाखविली कर्तव्यदक्षता

साखरवाडी : न्यू फलटण शुगर वर्क्स, साखरवाडी या साखर कारखान्याचे चालक भारत शिंदे यांना गाडी चालविताना हृदयविकाराचा तीव्र झटका आला. या धक्क्यातून सावरणे शक्य नसतानाही शेवटच्या क्षणापर्यंत कर्तव्य बजावत कारखान्याचे चेअरमन प्रल्हादराव साळुंखे-पाटील व अन्य तीन व्यक्तींना कोणतीही इजा होऊ न देता गाडी थांबवून शिंदे यांनी अखेरचा श्वास घेतला.मंगळवार, दि. ६ जानेवारी... दुपारची वेळ... साखरवाडी येथील न्यू फलटण शुगर वर्क्स साखर कारखान्याचे चेअरमन व कार्यकारी संचालक प्रल्हादराव साळुंखे-पाटील साखर व्यापारी विजय करवा व अन्य दोघांना घेऊन कारखान्याच्या कामानिमित्त त्यांच्या कारमधून अकलूजकडे निघाले होते. ड्रायव्हर म्हणून कारखान्याचे ट्रान्सपोर्ट विभागातील चालक भारत हणंमत शिंदे (वय ५१, रा. साखरवाडी, मूळगाव तांबवे, ता. फलटण) होते. गाडी साखरवाडी -फलटणमार्गे अकलूजकडे भरधाव वेगाने चालली होती. कार पिंपरद, ता. फलटण गावाजवळ आली असता चालक भारत शिंदे यांना अचानक हृदयविकाराचा तीव्र झटका आला. यावेळी पिंपरद गावाजवळील मंगल कार्यालयाचे पुढे लोकांची मोठ्या प्रमाणात वर्दळ होती. या तीव्र झटक्यातून सावरणे शक्य नसल्याचे शिंदे यांना जाणवले. त्यांनी त्या गंभीरप्रसंगातूनही गाडी नियंत्रणात आणून रस्त्याकडेला उभी केली आणि ती बंद करण्याआधीच अखेरचा श्वास घेतला. प्रल्हाद पाटील व इतर तिघांना काय झाले हे लगेच समजलेच नाही.
भारत शिंदे हे १९९९ पासून न्यू फलटण शुगर वर्क्स या साखर काखान्यातील ट्रान्सपोर्ट विभागात चालक म्हणून कार्यरत होते.
त्यांना साखर कामगारांच्या वतीने श्रद्धांजली वाहण्यासाठी मुख्य गेटवर शोकसभा घेण्यात आली. यावेळी युनियनचे माजी अध्यक्ष पोपटराव भोसले यांनी त्यांच्या कार्याचा आढावा घेतला. यावेळी बाळासाहेब भोसले, मारुती माडकर, चंद्रशेखर किरपेकर, सीताराम माने उपस्थित होते. (वार्ताहर)

शर्थीचे प्रयत्न अयशस्वी
अचानक घडलेल्या गंभीर प्रसंगाने प्रल्हाद पाटलांसह सर्वचजण घाबरले होते. यातून गाडी बंद करणेही लवकर जमले नाही. त्यातूनही सावरत प्रल्हाद पाटील यांनी प्रसंगावधान राखून भारत शिंदे यांना तातडीने फलटण येथे उपचारासाठी आणले; परंतु उपचारापूर्वीच त्यांचे निधन झाले.