Satara: खेड फाट्यावर मध्यरात्री भीषण अपघात, शेकडो वाहने अंगावरून गेल्याने तरुणाचा मृतदेह छिन्नविच्छिन्न

मृत तरुणाची ओळख पटविण्याचे प्रयत्न

सातारा: पुणे-बंगळुरू राष्ट्रीय महामार्गावर येथील खेड फाट्यावर सोमवारी मध्यरात्री एक भीषण अपघात घडला. एका ३५ वर्षीय तरुणाला अज्ञात वाहनाने धडक दिल्यानंतर त्याच्या अंगावरून शेकडो वाहने गेली. यामुळे त्याचा मृतदेह छिन्नविच्छिन्न झाला. मृत तरुणाची ओळख पटली नसून पोलिस नातेवाईकांचा शोध घेत आहेत.

बाॅम्बे रेस्टाॅरंट ते वाढे फाट्याकडे जाणाऱ्या महामार्गावर एका तरुणाचा मृतदेह छिन्नविच्छिन्न अवस्थेत असल्याचे सातारा शहर पोलिसांना समजले. त्यानंतर पोलिस घटनास्थळी पोहोचले. संबंधित तरुणाच्या अंगावरून शेकडो वाहने गेल्याने त्याचा मृतदेह छिन्नविच्छिन्न झाला होता. पोलिसांनी अक्षरश: शरीराचे तुकडे वेचून पोत्यात भरले. 

घटनास्थळाचे चित्र विदारक होते. त्या तरुणाच्या अंगात निळसर जीन्स पॅन्ट व राखाडी शर्ट आहे. त्याच्या खिशात पोलिसांना काहीच सापडले नाही. त्यामुळे त्याची ओळख पटविणे अत्यंत मुश्कील असल्याचे पोलिसांनी सांगितले. सातारा शहर पोलिस ठाण्यात या अपघाताची नोंद झाली असून, हवालदार महांगडे अधिक तपास करीत आहेत.