पाठीला कॅन बांधल्याने मुलगा वाचला, पण काळाने बापाला ओढलं; वारणा नदीपात्रातील काळजाचा थरकाप उडवणारी घटना

गुरुवारी दुपारी बाराच्या सुमारास ऋषिकेश खामकर आपल्या आठ वर्षांच्या शंभूला व नातेवाईक असणाऱ्या कार्तिक प्रकाश खामकर (वय-१६) यांना घेऊन पोहायला घेऊन गेले होते.

मांगले (जि. सांगली) : वारणा नदीवरील मांगले - काखे पुलाखाली आठ वर्षांच्या मुलाला पोहायला घेऊन गेलेल्या बापाचा पाण्यात बुडून मृत्यू झाल्याची घटना गुरुवारी दुपारी बाराच्या सुमारास घडली. ऋषिकेश भीमराव खामकर (वय ३५) असे या मृत तरुणाचे नाव आहे.

गुरुवारी दुपारी बाराच्या सुमारास ऋषिकेश खामकर आपल्या आठ वर्षांच्या शंभूला व नातेवाईक असणाऱ्या कार्तिक प्रकाश खामकर (वय-१६) यांना घेऊन पोहायला घेऊन गेले होते. मुलगा शंभूला पोहण्यास शिकवायचे होते. म्हणून ऋषिकेशने शंभूच्या पाठीला प्लास्टिक कॅन बांधून पोहायला वारणा नदीत सोडले होते. तर दुसरा नातेवाईक कार्तिक प्रकाश खामकर हा दहावीत आहे. त्याला पोहायला येत होते. 

त्याला पोहायला शिकवत असतानाच पिण्याच्या पाण्याचा पाणीपुरवठा करणारे जॅकवेल आहे. विद्युत पंपाचा पुरवठा खंडित झाल्यावर अचानक पुन्हा सुरू झाला. यादरम्यान पाण्याचा प्रवाह जॅकवेलच्या बाजूने जलद गतीने सुरू झाला. या प्रवाहाबरोबर ऋषिकेश पाण्यात घुटमळले व पाण्याच्या प्रवाहात वाहू लागले.

यादरम्यान, काही लोकांनी धाव घेऊन ऋषिकेशला वाचवण्याचा प्रयत्न करून पाण्याबाहेर काढले आणि तत्काळ रुग्णालयात दाखल केले असता डॉक्टरांनी मृत घोषित केले. ऋषिकेश यांचा मुलगा शंभू पाठीला प्लास्टिकचा कॅन बांधल्यामुळे पाण्यावर नदीपात्रातच तरंगत होता. त्यालाही लोकांनी बाहेर काढले. ऋषिकेशच्या पश्चात आई, वडील, पत्नी व लहान मुलगा असा परिवार आहे.