सांगली : महापालिका क्षेत्रात कोरोनाचा संसर्ग रोखण्यासाठी प्रशासनाने खबरदारी घेण्यास सुरुवात केली आहे. माॅल, मंगल कार्यालयापाठोपाठ आता खासगी क्लासेसची तपासणी सुरू केली आहे. त्यासाठी आयुक्त नितीन कापडणीस यांनी चार पथके नियुक्त केली आहेत. कोरोना नियमांचे पालन न करणाऱ्या आस्थापनांना नोटिसा बजाविल्या जाणार आहेत.
महापालिकेच्या पथकाकडून शुक्रवारपासून मंगल कार्यालये, मल्टिपर्पज हॉल, लॉन, मल्टिप्लेक्स, मॉल, खासगी क्लासेस, हॉटेल, बझार, सिनेमागृह आदी ठिकाणी तपासणीला सुरुवात करण्यात आली. वॉर्ड १६ मधील बारस्कर क्लासेसची तपासणी करून त्यांना नोटीस बजावण्यात आली. तसेच शहरामध्ये गर्दीची ठिकाणे असणाऱ्या सर्व आस्थापनांची तपासणी करून नोटीस बजावण्यात येणार आहे. नियमांचे उल्लंघन करणाऱ्या आस्थापनांवर दंडात्मक कारवाई केली जाणार आहे. यावेळी सहायक आयुक्त सहदेव कावडे, दिलीप घोरपडे, वरिष्ठ स्वच्छता निरीक्षक अविनाश पाटणकर व स्वच्छता निरीक्षक वैभव कुदळे उपस्थित होते.