थकबाकीदारांच्या घरासमोर ढोल-ताशे

महापालिकेची कारवाई : दिवसभरात ३५ लाखांची घरपट्टी वसूल

सांगली : महापालिकेच्या घरपट्टीची थकबाकी वसूल करण्यासाठी आज, मंगळवारपासून थकितांच्या घरासमोर ढोल-ताशे वाजविण्यात आले. सांगली, मिरज आणि कुपवाड या तीन शहरात वाजंत्रीच्या पाच पथकांद्वारे वसुलीची मोहीम हाती घेण्यात आली आहे. दिवसभर या पथकांनी याद्वारे साडेसहा लाखांची वसुली केली, तर एकूण ३५ लाखांची थकबाकी वसूल झाली आहे. ही मोहीम आणखी तीव्र करणार असल्याचे करनिर्धारक व संकलक सुनील नाईक यांनी सांगितले.
महापालिकेच्या घरपट्टीची ५० कोटीपेक्षा अधिक थकबाकी आहे. वारंवार नोटिसा बजावूनही कर वसुलीला नागरिकांकडून प्रतिसाद मिळत नाही. दरवर्षी थकबाकीचा आकडा वाढतच जात आहे. थकबाकी वसुलीसाठी वाजंत्री वाजविण्याचे आदेश महापौर विवेक कांबळे यांनी प्रशासनाला दिले होते. त्यानुसार प्रशासनाने आजपासून ही कारवाई सुरू केली. तीन शहरात पाच पथके तयार करण्यात आली आहेत. त्यात सांगलीत दोन, मिरजेत दोन व कुपवाडला एका पथकाद्वारे वसुली सुरू केली. थकबाकीदारांच्या घरासमोर ढोल-ताशे वाजविण्यात आले. सांगलीतील शंभरफुटी, शामरावनगर, रतनशीनगर, जामवाडी परिसरात वसुली मोहीम राबविण्यात आली.
पालिकेचे पथक वाजंत्रीसह दारात येताच थकबाकीदारांकडून विनवण्या होत होत्या. दारात ढोल-ताशे वाजवू नका, आम्ही कर भरतो, असा प्रतिसादही मिळत होता. सांगलीतील पथकाकडून दिवसभरात २० थकबाकीदारांकडून सहा लाख ६६ हजाराची वसुली झाली. दिवसभरात ३० लाख ८४ हजारांची घरपट्टी वसूल झाली. त्यात सांगलीतून २२.५६ लाख, मिरजेतून ७ लाख, तर कुपवाडमधील १.१९ लाख रुपयांचा समावेश आहे. (वार्ताहर)

२ हजार जणांना नोटिसा
महापालिकेने दहा हजारपेक्षा अधिक थकबाकी असलेल्या मालमत्ताधारकांवर लक्ष केंद्रित केले आहे. तीनही शहरातील दहा हजारापेक्षा अधिक थकबाकी असलेल्या दोन हजार मालमत्ताधारकांना नोटिसा बजाविल्या आहेत. पहिल्या टप्प्यात या मालमत्ताधारकांच्या दारात ढोल-ताशे वाजविले जाणार आहेत. त्याशिवाय पाणी कनेक्शन तोडण्याची कारवाईही हाती घेतली आहे. आज, मंगळवारी दोन पाणी कनेक्शन्स तोडण्यात आली.