Ratnagiri: भर दिवसा ओणी येथे बिबट्याच्या हल्ल्यात महिला जखमी

राजापूर : तालुक्यातील ओझर ते ओणी रस्त्यावर तिवरे गावातील खरब या ठिकाणी दिवसाढवळ्या बिबट्याने केलेल्या हल्ल्यात ओझर येथील अमिना मन्सूर मापारी जखमी झाल्या आहेत. गुरुवार, १२ जून रोजी सकाळी ९ वाजता ही घटना घडली.

मन्सूर अकबर मापारी (रा. ओझर), त्यांची पत्नी अमिना आणि मुलगा दुचाकीवरून राजापूरला जात होते. मौजे तिवरे (खरब) येथे रस्त्यात अचानक आलेल्या बिबट्याने त्यांच्यावर हल्ला केला. यात त्यांची पत्नी अमिना मन्सूर मापारी यांच्या उजव्या पायाच्या गुडघ्याला बिबट्याची नखे लागली. त्यांच्यावर ओणी प्राथमिक आरोग्य केंद्रात उपचार करण्यात आले असून त्यांची प्रकृती स्थिर असल्याची माहिती वनविभागाने दिली आहे.

ही घटना समजताच वनअधिकाऱ्यांनी रुग्णालयात जाऊन त्यांची विचारपूस केली आणि त्यांचे जबाब नोंदविले आहेत. राजापूरचे वनपाल जयराम बावदाणे, वनरक्षक विक्रम कुंभार, नितेश गुरव यांनी घटनास्थळी भेट देऊन पाहणी केली. अशा प्रकारच्या घटना घडल्यास किंवा वन्यप्राणी अडचणीत सापडल्यास वन विभागाचा टोल फ्री क्रमांक १९२६ किंवा ९४२१७४१३३५ या क्रमांकावर संपर्क साधण्याचे आवाहन विभागीय वन अधिकारी गिरिजा देसाई यांनी केली आहे.