Ratnagiri: शिमगोत्सवाचा आनंद लुटला, काही तासातच काळाचा घाला

खेड : शिमगोत्सवासाठी गावी कोंडिवली रोहिदासवाडी येथे आलेल्या संतोष भागोजी कोंडविलकर (वय ४९) यांचे सोमवार, ९ मार्च रोजी पहाटे हृदयविकाराच्या तीव्र झटक्याने निधन झाले. त्यांच्या अकस्मात निधनामुळे कोंडिवली परिसरासह मुंबईतील नातेवाईक व मित्र परिवारावर दुःखाचा डोंगर कोसळला आहे.

सिव्हिल कॉन्ट्रॅक्टर म्हणून मुंबईमध्ये यशस्वी व्यवसाय करणारे संतोष कोंडविलकर हे शिमगोत्सवासाठी गावी आले होते. रविवार, ८ मार्च रोजी त्यांनी सहकुटुंब देवीच्या पालखीचे मोठ्या भक्तिभावाने स्वागत केले. रोहिदासवाडी येथील विठ्ठल मंदिरात त्यांनी उत्साहात पालखी नाचवत शिमगोत्सवाचा आनंद लुटला. मात्र, या आनंदाच्या वातावरणातच दुसऱ्याच दिवशी पहाटे काळाने घाला घातला. हृदयविकाराच्या तीव्र झटक्याने त्यांचे निधन झाले.

‘संतोष दादा’ या नावाने ते परिसरात परिचित होते. त्यांच्या साध्या, मनमिळाऊ स्वभावामुळे त्यांचा मित्र परिवारही मोठा होता. मंगळवार, दि. १० मार्च रोजी त्यांच्यावर अंत्यसंस्कार करण्यात आले. त्यांच्या पश्चात पत्नी, दोन मुले, भाऊ, बहीण असा परिवार आहे.