दापोली : दापोली येथील कै. कृष्णमामा महाजन प्रतिष्ठानच्या माध्यमातून रक्तगट सूची तयार करण्यात आली आहे. गरजू रुग्णांना वेळेत रक्त उपलब्ध व्हावे, यासाठी या उपक्रमात अधिकाधिक नागरिकांनी सहभागी होऊन गुगल फॉर्म भरण्याचे आवाहनही प्रतिष्ठानतर्फे करण्यात आले आहे.
ऑनलाईन श्रध्दांजली
रत्नागिरी : हातीस ग्रामविकास मंडळ, मुंबईचे माजी अध्यक्ष मधुकर काशिनाथ नागवेकर उर्फ मधुभाऊ बाळकोजी यांचे मुंबई येथे निधन झाले. त्यांना मुंबई मंडळाचे अध्यक्ष शंतनू नागवेकर यांच्या अध्यक्षतेखाली ऑनलाईन श्रध्दांजली अर्पण करण्यात आली. यावेळी मंडळाचे अनेक सदस्य उपस्थित होते.
वादळग्रस्तांना केली मदत
राजापूर : राजापूर तालुक्यातील चक्रीवादळाने झालेल्या नुकसानासाठी शेतकऱ्यांना काँग्रेसतर्फे नवी मुंबईचे माजी उपमहापौर अविनाश लाड यांनी मदत केली. कोविड सेंटर्सनाही त्यांनी याआधी मोठी मदत केली आहे.
गरजू ग्रामस्थांना मदत
देवरूख : सामाजिक बांधिलकीचे भान राखत संगमेश्वर तालुक्यातील भडकंबा ग्रामपंचायतीच्या सदस्यांनी कोविड-१९च्या काळात अनेक कुटुंबियांना मदतीचा हात दिला आहे. लॉकडाऊनमुळे लोकांचा रोजगार बंद पडल्याने अनेक कुटुंबांचे हाल होत आहेत. हे लक्षात घेऊन हा मदतीचा हात पुढे करण्यात आला आहे.