मुंबई उपनगरांसह अन्य जिल्ह्यांतही आंबा एसटीतून पोहोचविण्यात आला होता. या वर्षीही एसटीने आंबा वाहतुकीचा निर्णय घेतला असून, त्यासाठी महामंडळाच्या मालवाहतूक गाड्याही सज्ज झाल्या आहेत. रत्नागिरी, सिंधुदुर्ग जिल्ह्यासह कोकण भागातून मुंबई, ठाणे, पुणे, सातारा, सांगली, कोल्हापूर, तसेच इतर जिल्ह्यामध्ये एसटी गाड्यांद्वारे आंबा वाहतूक करण्यात येणार आहे. मुंबईतील मुंबई सेंट्रल किंवा परळ, कुर्ला नेहरूनगर, पनवेल, ठाण्यामध्ये ठाणे-१ किंवा ठाणे-२, भिवंडी, बोरीवली-सुकुरवाडी किंवा कल्याण, पुणे पिंपरी-चिंचवड यासह सांगली, सातारा, कोल्हापूरला आंबा पाठविता येणार आहे.
आंबापेटी वाहतुकीसाठी ३०० किलोमीटरपासून ते १,५०० किलोमीटरपर्यंत पाच डझन आंब्याच्या पुठ्ठ्याच्या पेटीसाठी ४० रुपयांपासून १९० रुपयांपर्यंत दर निश्चित करण्यात आले आहेत. लाकडी पेटीसाठी ५० रुपयांपासून २५० रुपयांपर्यंत दर आकारण्यात येणार आहेत. दोन डझन पेटीसाठी २५ पासून ११० रुपये दर निश्चित करण्यात आला आहे. बागायतदारांनी, शेतकऱ्यांनी जवळच्या आगारात संपर्क साधावा, असे आवाहन करण्यात आले आहे.
एसटीचे अधिकारी बागायतदारांशी सातत्याने संपर्क साधत असून, आंबा वाहतुकीसाठी आवाहन करीत आहेत.
थेट बागेतून वाहतूक
बागायतदारांशी संपर्क साधून थेट बागेतून आंबा पेट्या उचलण्याची तयारी एसटी प्रशासनाने दर्शविली आहे. मात्र, त्यासाठी किमान ५० पेट्या एकाच ठिकाणी असणे आवश्यक आहे. सध्या आंबा उत्पादन अल्प असल्याने मोठ्या प्रमाणात, शिवाय एकाच ठिकाणी एसटीला आंबा उपलब्ध होणे अशक्य आहे.
दरामध्ये फरक
खासगी वाहतूकदारांच्या तुलनेत एसटीचे वाहतूक भाडे किफायतशीर आहे. खासगी वाहतूकदार एक किंवा पाच दहाच्या पटीतील पेट्यांसाठी बागायतदार सांगतील, त्या ठिकाणापर्यंत पोहोचण्याची तयारी दर्शवितात. मात्र, एसटी मालवाहतुकीसाठी काही निर्बंध आहेत. एकाच ठिकाणी जास्त पेट्या उपलब्ध असण्याची अट असल्यामुळे खासगी वाहतूकदारांकडे शेतकरी वळत आहेत.