कशेडी घाटात होणार आठ कि.मी.चा बोगदा

जिल्हाधिकारी आणि ठेकेदारांच्या उपस्थितीत बैठक घेऊन तसा आदेश दिल्याची माहिती वायकर यांनी दिली

खेड : मुंबई-गोवा महामार्गावरील सुरक्षित वाहतुकीकरिता कशेडी घाटादरम्यान ८ किलोमीटरचा नवा बोगदा तयार करणार असून, तसा आदेश देण्यात आल्याची घोषणा पालकमंत्री रवींद्र वायकर यांनी केली.वायकर हे प्रथमच खेडमध्ये आल्यामुळे खेड तालुका शिवसेनेच्यावतीने येथील सभापती निवासस्थानामध्ये त्यांच्या सत्काराचे आयोजन करण्यात आले होते. शिवसेनेंतर्गत तालुक्यात असलेल्या मतभेदांच्या पार्श्वभूमीवर उपस्थित पदाधिकारी व कार्यकर्त्यांना वायकर यांनी पक्षहिताच्या दृष्टीने एकत्र येण्याचे आवाहन केले. वायकर यांनी महामार्गाच्या चौपदरीकरणदरम्यान कशेडी घाटामध्ये ८ किलोमीटर अंतराचा नवीन बोगदा तयार करण्याचा संकल्प सोडला आहे. जिल्हाधिकारी आणि ठेकेदारांच्या उपस्थितीत बैठक घेऊन तसा आदेश दिल्याची माहिती वायकर यांनी दिली. येथील विकासकामांसदर्भात आजपासूनच आपण लक्ष घातले असून, कामे विनाविलंब मार्गस्थ होण्याच्या दृष्टीने तीन महिन्यांतून एकदा खेडमध्ये जनता दरबार भरविणार असल्याचे जाहीर केले. याप्रसंगी जिल्हाप्रमुख सचिन कदम, माजी जिल्हाप्रमुख शशिकांत चव्हाण, महिला आघाडीप्रमुख महाडिक, खेडचे पहिले शाखाप्रमुख सुधा बुटाला, तालुकाप्रमुख राजा बेलोसे, जिल्हा परिषदेचे माजी अध्यक्ष शंकर कांगणे, सभापती चंद्रकांत कदम, जिल्हा परिषद सभापती अरुणा आंब्रे उपस्थित होते.(प्रतिनिधी)