चोरीच्या आरोपामुळे तरुण नैराश्यात; टोकाचे पाऊल उचलून संपवली जीवनयात्रा

खासगी ठिकाणी कामाला असणाऱ्या तरुणावर आरोपींनी चोरीचा आरोप करत शिवीगाळ करून मारहाण केली होती

पुणे: चोरीचा आरोप केल्याने एका तरुणाने धावत्या रेल्वेखाली आत्महत्या केल्याची घटना हडपसरमधील फुरसुंगी भागात घडली. तरुणाला आत्महत्येस प्रवृत्त केल्याप्रकरणी फुरसुंगी पोलिसांनी दोघांवर गुन्हा दाखल केला आहे.

अतुल लक्ष्मण अहिरे (२२, रा. पापडे वस्ती, फुरसुंगी ) असे आत्महत्या केलेल्या तरुणाचे नाव आहे. याबाबत अहिरे याच्या भावाने फिर्याद दिली आहे. पोलिसांनी दिलेल्या माहितीनुसार, अतुल अहिरे खासगी ठिकाणी कामाला होता. आरोपींनी त्याच्यावर चोरीचा आरोप करत शिवीगाळ करून मारहाण केली होती. या आरोपामुळे अतुल नैराश्यात होता. मानसिक तणावाखाली त्याने २३ फेब्रुवारी रोजी मध्यरात्री पुणे ते काेल्हापूर लोहमार्गावर धावत्या रेल्वेखाली उडी मारून आत्महत्या केली. सहायक पोलिस निरीक्षक नानासाहेब जाधव तपास करत आहेत.