भाजप शहराध्यक्षांची वीज चोरीवरून युवक काँग्रेस आक्रमक

- कारवाईची मागणी वीज वितरण कंपनी कार्यालयासमोर आंदोलन

पुणे: भारतीय जनता पक्षाचे शहराध्यक्ष धीरज घाटे यांनी त्यांच्या जुन्या निवासस्थानी असलेल्या महापालिका क़ॉलनीमधील व्यायामशाळेला चोरून वीज घेतल्याच्या प्रकरणावरून आक्रमक झालेल्या युवक काँग्रेसने शुक्रवारी सकाळी वीज वितरण कंपनीच्या रास्ता पेठ कार्यालयासमोर आंदोलन केले. पोलिसांनी त्वरीत त्यांना ताब्यात घेतले व तासाभरानंतर समज देऊन सोडून दिले.

युवक काग्रेसचे शहराध्यक्ष सौरभ अमराळे तसेच राज्य पदाधिकारी अक्षय जैन, प्रथमेश आबनावे व अन्य अनेक कार्यकर्ते यात सहभागी झाले होते. धीरज घाटे यांनी त्यांच्या व्यायामशाळेला चोरून वीज वापरली असल्याचा आरोप आहे. यासंदर्भात वीज वितरण कंपनीने त्यांना दंड ठोठावला आहे. जैन यांनी सांगितले की १२ वर्षे वीज चोरली जात असताना दंड मात्र एकाच वर्षाचा आहे.

यात राजकीय हस्तक्षेप होत आहे. घाटे यांच्यावर कसलीही कारवाई झालेली नाही. १२ वर्षांचा दंड वसूल करणे गरजेचे आहे. असे असताना त्यांना वाचवण्याचा प्रयत्न भाजपच्या बड्या राजकीय धेंडांकडून केला जात आहे. आमचे आंदोलन त्याविरोधात आहे. यासंदर्भात वीज वितरण कंपनीच्या वरिष्ठ अधिकाऱ्यांची भेट घेतली, त्यांना निवेदन दिले. कारवाईची मागणी केली, मात्र त्यांच्याकडून कसलीही दखल घेतली जात नाही. त्यामुळे आंदोलनाचा मार्ग पत्करावा लागला.

कार्यकर्त्यांनी एकत्र जमून रस्त्यावरच ठाण मांडले. घोषणा देत परिसर दणाणून सोडला. समर्थ पोलिस ठाण्याच्या पोलिसांनी त्यांना अटकाव केला, मात्र रस्त्यावरून उठण्याच्या मनस्थितीत कार्यकर्ते नव्हते. पोलिसांनी सगळ्यांना धरून गाडीत बसवले. जैन, आबनावे, अमराळे, किशोर मारणे, उमेश पवार, आनंद कुमार दुबे, मेघशाम धर्मावत, राज जाधव, हर्षद हांडे, अक्षय बहिरट, सद्दाम शेख,ऋषीकेश विरकर, ऋतिक शिंदे, मतीन शेख, अनिरूद्ध जगदाळे तसेच अन्य कार्यकर्त्यांना पोलिसांनी गाडीत बसवले व समर्थ पोलिस ठाण्यात आले. तिथे त्यांना तासभर बसवून ठेवण्यात आले. त्यानंतर समज देऊन सोडून देण्यात आले. आम्ही हा विषय अर्धवट सोडणार नाही तर कंपनीच्या वरिष्ठ अधिकाऱ्यांना भेटून कारवाई करायला लावणार आहोत, कायदेशीर कारवाई करण्याची प्रक्रियाही आम्ही सुरू केली आहे असे जैन यांनी सांगितले.