तू मला शिवी का दिली? पुण्यात महाविद्यालयीन तरुणावर जीवघेणा हल्ला; कोयता डोक्यात अडकला, डॉक्टरांनी वाचवले प्राण

गंभीर अवस्थेत तरुणाला रुग्णालयात दाखल करण्यात आले, डॉक्टरांनी शर्थीचे प्रयत्न करत शस्त्रक्रिया करून कोयता काढला आणि तरुणाचे प्राण वाचवले.

शगुप्ता शेख 

पुणे : शहरात वाढत्या गुन्हेगारीच्या घटनांमुळे पुन्हा एकदा चिंता व्यक्त केली जात आहे. विशेषतः महाविद्यालयीन तरुणांमधील किरकोळ वादातून हिंसक हल्ल्यांच्या घटना वारंवार समोर येत आहेत. अशाच एका धक्कादायक घटनेत वाघोली परिसरात एका महाविद्यालयीन तरुणावर कोयत्याने जीवघेणा हल्ला करण्यात आला. या हल्ल्यात आरोपीने केलेला एक वार इतका जोरदार होता की कोयता थेट तरुणाच्या डोक्यात अडकला. गंभीर अवस्थेत त्याला रुग्णालयात दाखल करण्यात आले. डॉक्टरांनी शर्थीचे प्रयत्न करत शस्त्रक्रिया करून कोयता काढला आणि तरुणाचे प्राण वाचवले.

ही धक्कादायक घटना १२ मार्च रोजी दुपारी साडेतीनच्या सुमारास वाघोली येथील रायसोनी कॉलेज गेटसमोरील ‘अखंड अमृततुल्य’ हॉटेलजवळ घडली. नागेश सुनिल जगताप असे जखमी झालेल्या तरुणाचे नाव आहे. नागेश हा आपल्या मित्रासोबत हॉटेलवर चहा पिण्यासाठी थांबला असताना आरोपी मंगेश सांगळे आणि पवन राठोड हे दोघे तेथे आले.

‘तू मला शिवी का दिलीस?’ असा सवाल करत आरोपींनी नागेशसोबत वाद घालण्यास सुरुवात केली. किरकोळ वादाचे रूपांतर काही क्षणांतच हिंसक हल्ल्यात झाले. संतापाच्या भरात आरोपींनी नागेशवर कोयत्याने सपासप वार केले. त्यापैकी एक वार इतका भयंकर होता की कोयता नागेशच्या डोक्यात अडकून राहिला.

हल्ल्यानंतर परिसरात मोठी खळबळ उडाली. जखमी अवस्थेत असलेल्या नागेशला त्याच्या मित्रांनी आणि स्थानिकांनी तातडीने जवळच्या रुग्णालयात दाखल केले. डॉक्टरांनी तातडीने उपचार सुरू करून शस्त्रक्रियेच्या माध्यमातून त्याच्या डोक्यात अडकलेला कोयता बाहेर काढला. सुदैवाने नागेशचे प्राण वाचवण्यात डॉक्टरांना यश आले. दरम्यान, हा संपूर्ण प्रकार परिसरातील सीसीटीव्ही कॅमेऱ्यात कैद झाला आहे. फुटेजमध्ये आरोपी तरुणावर कोयत्याने हल्ला करताना स्पष्ट दिसत आहेत. या घटनेनंतर पोलिसांनी तात्काळ गुन्हा दाखल करून तपास सुरू केला.

तांत्रिक तपास, सीसीटीव्ही फुटेज आणि स्थानिकांकडून मिळालेल्या माहितीच्या आधारे पोलिसांनी आरोपींचा शोध घेतला. या प्रकरणात मुख्य आरोपी मंगेश सांगळे आणि पवन राठोड यांना अटक करण्यात आली आहे. पोलिसांनी त्यांची कसून चौकशी सुरू केली असून हल्ल्यामागील नेमके कारण काय होते आणि या घटनेत आणखी कोणाचा सहभाग आहे का, याचा तपास सुरू आहे. सध्या जखमी तरुणावर रुग्णालयात उपचार सुरू असून या घटनेमुळे वाघोली परिसरात भीतीचे वातावरण निर्माण झाले आहे.