पुण्यात हे चाललंय काय! १२ विद्यार्थ्यांना उडवले; चालकाने मद्यपान केल्याची धक्कादायक माहिती समोर...

सदाशिव पेठेतील भावे हायस्कुलजवळ रस्ते अतिशय अरुंद असूनही भरधाव कारने १२ जणांना उडवल्याने भीतीचे वातावरण निर्माण झाले आहे.

पुणे : शहराच्या मध्यवर्ती भागात सदाशिव पेठेत असलेल्या भावे हायस्कूल जवळ एका कारचालकाने १२ जणांना उडविल्याची घटना शनिवारी (दि. ३१) सायंकाळी पावणे सहाच्या सुमारास घडली. या घटनेत चालकाने मद्यपान केल्याची धक्कादायक माहिती समोर आली आहे. मध्यवर्ती भागातून असे मद्यपी गाड्या चालवत असतील. तर सामान्य माणसाने रस्त्याने चालायचे कसे? असा सवाल नागरिकांनी उपस्थित केला आहे. 
 
शहराच्या मध्यवर्ती भागात भावे हायस्कुल जवळ हा अपघात झाला आहे. या परिसरातील रस्ते अतिशय अरुंद आहेत. २ चारचाकी एकत्र आल्या तरी ट्राफिक झाल्याचे निदर्शनास आले आहे. अशा ठिकाणी हा भीषण अपघात घडला आहे. त्यामुळे नागरिकात भीतीचे वातावरण निर्माण झाले आहे. अशातच मद्यधुंद चालकाने १२ जणांना उडवल्याने नागरिकांमधून संताप व्यक्त होऊ लागला आहे. सर्व जण जखमी झाले असून कोणत्याही प्रकारची जीवितहानी न झाल्याची माहिती समोर आली आहे.    

या घटनेत जखमी असलेले सर्वजण एमपीएससीची तयारी करणारे विद्यार्थी असल्याचे निष्पन्न झाले आहे. यातील चौघांचे फ्रॅक्चर झाल्याने संचेती हॉस्पिटलमध्ये दाखल करण्यात आले आहे, तर उर्वरित जखमींना शेजारील रुग्णालयातच दाखल केले आहे. चालक जयराम शिवाजी मुळे (वय २७, रा. बिबवेवाडी) याला विश्रामबाग पोलिसांनी ताब्यात गेतले असून तो मद्यधुंद असल्याचे सांगितले जात आहे. जखमी विद्यार्थी एका चहाच्या टपरीवर चहासाठी एकत्रित आले होते. कारचालकाचे नियंत्रण सुटल्याने त्याने बारा जणांना धडक दिली. प्राथमिक माहितीनुसार या बारा जणांपैकी तिघांना संचेती हॉस्पिटलमध्ये उपचारासाठी दाखल करण्यात आले आहे तर अन्य नऊ किरकोळ जखमींना योगेश हॉस्पिटलमध्ये दाखल करण्यात आले आहे. 

कारचालकाची वैद्यकीय तपासणी करण्यासाठी पोलिसांनी त्याला ससून रुग्णालयात नेले आहे. या प्रकरणी गुन्हा दाखल करण्यात आला असून पुढील तपास सुरु आहे. अविनाश दादासो फाळके ,प्रथमेश पांडुरंग पतंगे, संदीप सुनील खोपडे, सोनाली सुधाकर घोळवे, मंगेश आत्माराम सुरवसे, अमित अशोक गांधी, समीर श्रीपाद भालचिकर, सोमनाथ केशव मेरूकट, प्रशांत ब्रह्मदेव बंडगर, किशोर हरिभाऊ भापकर, पायल आदेश कुमार दुर्गे, गुलणाज सिराज अहमद अशी जखमी विद्यार्थ्यांची नावे आहेत. 

जखमी १२ जणांचे जबाब घेण्याची प्रक्रिया सुरू आहे. अजूनही दोन ते तीन जण रुग्णालयात आहे. चार ते पाच जणांना फ्रॅक्चर आहे. बाकीचे लोक जखमी आहेत. कारचालकासह सहप्रवासी दोघेही मद्य पिले असण्याची शक्यता आहे. चालक, सहप्रवासी आणि गाडीमालकाला ताब्यात घेण्यात आले आहे. गाडीचा मालक आणि चालक यांच्यामधील कराराची कागदपत्रे तपासून गुन्हा दाखल करण्याची प्रक्रिया सुरू आहे.- निखिल पिंगळे, पोलीस उपायुक्त, गुन्हे, प्रभारी परिमंडळ १