पांडुरंग मरगजे
धनकवडी : पॉझिटिव्ह रुग्णांबाबत आपल्या समाजात अजूनही अनेक गैरसमज आहेत. बऱ्याचदा कोणतीही चूक नसताना काहींना या जीवघेण्या आजाराला सामोरे जावे लागते. त्यापेक्षा समाजात वावरताना मिळणारी वागणूक फार त्रासदायक होते. त्यामुळे अनेक बाधित लोक एकटे पडतात आणि खचून जातात तरीही जोडीदाराच्या रूपाने आशेचा किरण मिळाल्यास ते आनंदी जीवन जगू शकतात. त्यासाठी ममता फौंडेशनमध्ये नुकताच एक अनोखा विवाह सोहळा पार पडला. ‘साथ जियेंगे, साथ मरेंगे’ म्हणत एचआयव्ही बाधित तरुण-तरुणी लग्नबंधनात अडकले.
गुजरवाडी येथील ममता फौंडेशन एड्सबाधितांचं आश्रयस्थान असून एचआयव्ही संक्रमित आईमुळे मुलांनाही एचआयव्हीची लागण झालेली असते. अशा मुलांच्या संगोपनाचा प्रश्न अतिशय गंभीर बनलेला असतो. अशाच मुलांचे संगोपन करण्यासाठी डॉ. शिल्पा व अमर बुडूख दाम्पत्यांनी २००८ मध्ये ममता फौंडेशनची स्थापना केली. या ठिकाणी संपूर्ण महाराष्ट्रभरातून अनेक जिल्हा आणि गावातून लहान मुले दाखल झाली. योग्य औषधोपचार, उत्तम वातावरण आणि सकस आहार, व्यायाम याद्वारे या मुलांची मानसिक आणि शारीरिक शक्ती वाढवण्याचं काम या ठिकाणी होत असतं.
ममतामधील या अनोख्या विवाह सोहळ्यात कधी काळी एक एचआयव्ही संक्रमित असलेलं लहान मूल आणि मुलगी दाखल झाली, नुकतंच त्याच लग्न झालं तसेच त्याच्या बरोबर अजून एक जोडप्यांचा ही विवाह झाला. या विवाह सोहळ्याची जय्यत तयारी करण्यात आली होती. हळद, मेंहदी, बँडने वातावरण प्रसन्न झाले होते. विवाह सोहळ्यास माजी नगरसेवक प्रकाश कदम, अभिनेत्री तेजस्विनी पंडित, अभिनेता जगन्नाथ निवंगुणे, माजी सरपंच दीपक गुजर, वरिष्ठ पोलिस निरीक्षक सावळाराम साळगांवकर, संगीता यादव, शरद सोनवणे, प्रताप निकम, आरोग्य निरीक्षक प्रमोद ढसाळ, ॲड. दिलीप जगताप यांच्यासह अनेक मान्यवर उपस्थित होते.
सामाजिक उपक्रमासाठी अनेक जण एकत्र आलं तर काय होतं त्याचं हे उदाहरण आहे, असे मत ममता फौंडेशनच्या अध्यक्षा डॉ. शिल्पा बुडूख यांनी व्यक्त केले. ममता फौंडेशन एचआयव्ही बाधितांना आशेचा किरण असून संस्थेतून एचआयव्ही बाधित मुलांना नवे जीवन मिळत असते. औषधोपचारासोबतच संस्थेत मुलांना व्यावसायिक प्रशिक्षणही दिले जाते. त्यामुळे ही मुले स्वत:च्या पायावर उभी राहतात. त्यामुळे आता एचआयव्हीबाधितांच्या लग्नासाठी जास्तीत जास्त प्रयत्न व्हायला हवेत.
वैद्यकशास्त्रातील संशोधनामुळे एचआयव्ही संक्रमित आई-वडिलांची मुले संक्रमित होत नाहीत. त्यासाठी एचआयव्ही बाधितांना आनंदी जीवनासाठी आशेचा किरण मिळावा म्हणून प्रयत्न केले जातात. - शिल्पा बुडूख