Pune: फोटो सोशल मीडियावर व्हायरल करण्याची धमकी; त्रासामुळे युवतीने उचलले टोकाचे पाऊल

शेजारी राहणाऱ्या एका तरुणाशी युवती बोलत असल्याने आरोपी तिला त्रास देत होता

पुणे : तरुणाच्या त्रासाला कंटाळून अल्पवयीन युवतीने इमारतीतून उडी मारून आत्महत्या केल्याची धक्कादायक घटना बाणेर भागात घडली. आरोपी तरुणाने युवतीची छायाचित्रे सोशल मीडियावर व्हायरल करण्याची धमकी दिली होती. साक्षी शिवाजी आवटे (वय १७, रा.बालेवाडी) असे आत्महत्या केलेल्या युवतीचे नाव आहे. तिला आत्महत्येस प्रवृत्त केल्याच्या आरोपावरून गोरख सुग्रीव गोरे (वय २१, सध्या रा.एफ रेसीडन्सीजवळ, बालेवाडी, मूळ रा.शंकरनगर, पाटोदा, जि.जालना) याच्याविरोधात गुन्हा दाखल करण्यात आला आहे. याबाबत तरुणीचा भाऊ दीपक शिवाजी आवटे (वय २१) याने बाणेरपोलिस ठाण्यात फिर्याद दिली आहे.

पोलिसांनी दिलेल्या माहितीनुसार, शेजारी राहणाऱ्या एका तरुणाशी युवती बोलत असल्याने आरोपी तिला त्रास देत होता. आरोपी तरुणाने तिचे फोटो सोशल मीडियावर व्हायरल करण्याची धमकी दिली होती. शनिवारी (दि. ४) सकाळी साडेअकराच्या सुमारास युवतीने इमारतीतून उडी मारून आत्महत्या केली. पुढील तपास गुन्हे शाखेच्या पोलिस निरीक्षक अलका सरग करत आहेत.