"विलिनीकरणाची चर्चा थांबलेली नाही, ते होणार; आम्ही सगळे सकारात्मक आहोत", आमदार सुनील शेळकेंनी मांडली स्पष्ट भूमिका

राष्ट्रवादी काँग्रेस (अजित पवार) आणि राष्ट्रवादी काँग्रेस (शरद पवार) या दोन्ही पक्षाचे विलिनीकरण ठरले होते, अशी चर्चा अजित पवारांच्या निधनांनंतर सुरू झाली आहे. राष्ट्रवादी काँग्रेसचे (अजित पवार) प्रदेशाध्यक्ष सुनील तटकरे यांनी अशी काही चर्चा झाली नसल्याचे म्हटले. मात्र, अजित पवारांच्या जवळ राहिलेले आमदार सुनील शेळके यांनी मात्र वेगळी माहिती देत भूमिका मांडली आहे. 

"विलिनीकरणाची चर्चा थांबलेली नाहीये. विलिनीकरण होईल, याबद्दल कुणाच्याही मनात शंका असण्याचे कारण नाही. त्याला देखील आम्ही सगळेजण सकारात्मकच आहोत", असे सांगत राष्ट्रवादी काँग्रेस (अजित पवार) पक्षाचे आमदार सुनील शेळके यांनी दोन्ही गटांचे विलिनीकरण पुढील १०-१५ दिवसांमध्ये होणार असल्याचे विधान केले. 

एका वृत्तवाहिनीला दिलेल्या मुलाखतीत बोलताना आमदार सुनील शेळके यांनी सांगितले की, "अजित पवारांचे अकाली जाणं कुणालाही मान्य नाही. पण, काही तांत्रिक बाबी असल्याने हे करावं लागत आहे. उपमुख्यमंत्री पदाची प्रक्रिया पार पडल्यानंतर दहा-पंधरा दिवसांनी दोन्ही राष्ट्रवादी एकत्र येणं, हा प्रस्ताव असेल किंवा इतर खात्याची जबाबदारी कुणाला द्यायची. मग त्यात शरद पवारांची राष्ट्रवादी असेल किंवा अजित पवारांची असेल. या सगळ्या प्रक्रिया पुढच्या १५ दिवसांनी केल्या जातील."

"...म्हणून शपथविधीची घाई आम्हाला करावी लागली"

पक्षाचा अध्यक्ष कोण असावं, कारण प्रफुल्ल पटेलांनी देखील त्याबद्दल इच्छा व्यक्त केली आहे, असा प्रश्न त्यांना विचारण्यात आला. त्यावर आमदार शेळक म्हणाले की, "हा पक्ष अजित पवारांचा आहे आणि काही जरी झाले तरी राष्ट्रीय अध्यक्ष पवार कुटुंबातीलच व्यक्ती होईल. सुनेत्रा वहिनींकडे सूत्रे देणे, हीच अजित पवारांना आमच्याकडून दिलेली श्रद्धांजली असेल. सुनेत्रा पवार या खऱ्या अर्थाने या राजकीय पक्षाच्या वारसदार असतील, असे माझं व्यक्तिगत मत आहे."

"प्रत्येक पक्षाच्या घटना ज्या आहेत, त्या वेगवेगळ्या पद्धतीने तयार केलेल्या असतात. जी राष्ट्रवादी काँग्रेस पक्षाची घटना होती, त्यानुषंगाने ही सगळी प्रक्रिया आम्हाला चौथ्या दिवशी करण्याची वेळ आलेली आहे. ही घाई करण्याची वेळ आमच्या पक्षाच्या घटनेमुळे आहे. आणि काही तांत्रिक अडचणींमुळे करावी लागलेली आहे", आमदार सुनील शेळके यांनी सांगितले.   

"शपथविधीनंतर सुनेत्रा पवार बारामतीला जातील. त्यानंतर काय निर्णय घ्यायचे, ते १२-१५ दिवसांनी... मग दोन्ही राष्ट्रवादी काँग्रेसचा निर्णय असेल. मंत्रिमंडळात कोणाचा समावेश करायचा आहे, कोणाला कोणत्या खात्याची जबाबदारी द्यायची आहे, ही सगळी प्रक्रिया पंधरा दिवसांनी केली जाईल", अशी माहिती त्यांनी दिली.