पुण्यात धक्कादायक घटना; सिंहगड कॉलेजच्या विभागप्रमुखाने उचलले टोकाचे पाऊल

आत्महत्येमागील नेमके न समजल्याने पोलीस विविध अंगांनी तपास करत आहेत, तसेच कुटुंबीय आणि संबंधित व्यक्तींचीही चौकशी करण्यात येत आहे

पुणे : पुणे शहरात एक धक्कादायक घटना समोर आली आहे. सिंहगड डेंटल कॉलेजचे विभागप्रमुख (HOD) असलेल्या एका प्राध्यापकांनी राहत्या घरी गळफास घेऊन आत्महत्या केल्याची घटना उघडकीस आली आहे. या घटनेमुळे शैक्षणिक क्षेत्रात मोठी खळबळ उडाली आहे.

मिळालेल्या माहितीनुसार, राजू पाटील असे आत्महत्या केलेल्या प्राध्यापकांचे नाव आहे. ते पुण्यातील सिंहगड डेंटल कॉलेजमध्ये विभागप्रमुख (HOD) म्हणून कार्यरत होते. त्यांनी त्यांच्या राहत्या घरी गळफास घेऊन आपले जीवन संपवल्याची घटना समोर आली आहे. ही घटना दुपारी साधारण १२ वाजताच्या सुमारास उघडकीस आली. राजू पाटील यांची पत्नी घरी आल्यानंतर हा प्रकार त्यांच्या निदर्शनास आला. घरामध्ये पती गळफास घेतलेल्या अवस्थेत दिसताच त्यांनी तात्काळ पोलिसांना याची माहिती दिली. त्यानंतर पोलिसांनी घटनास्थळी धाव घेत पंचनामा केला. घटनेची माहिती मिळताच परिसरात खळबळ उडाली असून, पोलिसांनी मृतदेह ताब्यात घेऊन पुढील तपास सुरू केला आहे. आत्महत्येमागील नेमके कारण काय आहे, याचा शोध घेण्यासाठी पोलिस विविध अंगांनी तपास करत आहेत. तसेच कुटुंबीय आणि संबंधित व्यक्तींचीही चौकशी करण्यात येत आहे.