सेवानिवृत्त मेजरला १ कोटी ११ लाखांचा गंडा; केअर टेकरने साथीदाराच्या मदतीने केली फसवणूक

पेन्शन काढण्यासाठी गेल्यानंतर बँक खात्यातील पैसे कमी झाल्याचे निदर्शनास आल्यानंतर मेजरनी बँकेला कळवले होते

पुणे: सेवानिवृत्त ८७ वर्षीय मेजरचे चेकबुक चोरून तब्बल १ कोटी ११ लाख ९३ हजार रुपयांचा आर्थिक गंडा घातल्याचा प्रकार समोर आला आहे. त्यांच्याकडे काम करणाऱ्या केअर टेकरने आपल्या एका साथीदाराच्या मदतीने ही फसवणूक केली आहे. पेन्शन काढण्यासाठी गेल्यानंतर बँक खात्यातील पैसे कमी झाल्याचे निदर्शनास आल्यानंतर मेजरनी बँकेला कळवले होते. एक व्यक्ती त्यांचा चेक घेऊन बँकेत आला होता. बँकेने ही माहिती लष्कर पोलिसांना दिली. त्यानुसार पोलिसांनी केअर टेकरचा साथीदार सुप्रीतसिंग भूपेंद्र कंडारिया (३९, रा. कोथरूड) याला अटक केली आहे, तर मुख्य सूत्रधार केअर टेकर राज शहा आणि इतरांविरोधात गुन्हा दाखल केला आहे.

याबाबत सेवानिवृत्त मेजर बोमन इरुशॉ अमारिया (८७) यांनी फिर्याद दिली आहे. हा प्रकार मार्च २०२५ ते २८ जानेवारीदरम्यानच्या कालावधीत घडला आहे. पोलिसांनी दिलेल्या माहितीनुसार, मेजर बोमन अमारिया यांना मूलबाळ अथवा वारसदार नाही. ते एकटेच असल्याने त्यांनी राज शहा याला केअर टेकर नेमले होते. मात्र, तो फरार झाला. त्याने जाताना आपल्यासोबत बोमन यांच्या बँक खात्याचे चेकबुक चोरी करून आपल्या सोबत घेऊन गेला होता. काही काळाने ते वृद्धाश्रमात राहायला गेले. त्यांच्या बँक खात्यात पेन्शन जमा होत होती. ते वृद्धाश्रमात गेल्यानंतर केअर टेकर राज शहा याने सुप्रीतसिंग कंडारिया व इतरांच्या मदतीने त्यांच्या बँक खात्यातून धनादेशाद्वारे पैसे काढले. त्यावर बनावट सही करून वेळोवेळी १ कोटी ११ लाख ९३ हजार ९०० रुपयांची रक्कम काढली. बँक खात्यातील पैसे कमी झाल्याचे बोमन यांच्या लक्षात आल्यावर त्यांनी बँकेसोबत संपर्क साधला. त्यांनी बँकेला सांगितले की, जर कोणी माझ्या नावाच्या चेकद्वारे पैसे काढण्यास आला तर तुम्ही ही माहिती मला किंवा पोलिसांना द्या. कॅम्पमधील बँक ऑफ इंडियाच्या शाखेत सुप्रीतसिंग हा पैसे काढण्यासाठी आला. बँकेतील अधिकाऱ्याच्या हा प्रकार लक्षात येताच त्यांनी लष्कर पोलिसांना ही माहिती दिली. त्यानुसार पोलिसांनी त्याला पकडले. केअर टेकर राज शहा आणि त्याचे इतर साथीदार अद्याप फरार आहेत. पोलिस त्यांचा शोध घेत आहेत. शहा याला मेजर बोमन यांच्या बँक खात्याची सर्व माहिती होती. तोच त्यांचे सर्व व्यवहार पाहत असे. त्याच संधीचा फायदा घेत त्याने चेकबुक चोरी करून बोमन यांच्या सह्या अगोदरच त्यावर घेऊन ठेवल्या असाव्यात किंवा त्याने बनावट सह्या केल्या असाव्यात, असा अंदाज पोलिसांकडून वर्तवण्यात येतो आहे.