माउलींच्या पायीवारी पालखी सोहळ्याचे वेळापत्रक लांबणीवर

- आषाढी वारी : पुणे मुक्कामातील सोयी-सुविधांचा पेच; चर्चेनंतर १ मे रोजी अंतिम निर्णय

आळंदी : संतश्रेष्ठ श्री ज्ञानेश्वर महाराज आषाढी वारी पालखी सोहळ्याचे बहुप्रतीक्षित वेळापत्रक सोमवारी (दि. १३) जाहीर होणार होते. मात्र, काही तांत्रिक आणि नियोजनाच्या कारणास्तव हे वेळापत्रक लांबणीवर टाकण्याचा निर्णय श्री ज्ञानेश्वर महाराज संस्थान समितीने घेतला आहे. पुण्यातील भवानी पेठ येथील विठ्ठल मंदिर मुक्कामाच्या ठिकाणी सोयी-सुविधांबाबत अद्याप ठोस लेखी प्रस्ताव प्राप्त न झाल्याने संस्थानने हा महत्त्वपूर्ण निर्णय घेतला आहे.

संस्थानने दिलेल्या प्रसिद्धी पत्रकानुसार, पालखी सोहळ्याचे वेळापत्रक १३ एप्रिल रोजी जाहीर करण्यात येणार होते. परंतु, ९ आणि १० जुलै रोजी पुणे मुक्कामादरम्यान पालखी विठ्ठल मंदिर, भवानी पेठ येथे राहणार आहे. या ठिकाणच्या सुविधा, उपाययोजना आणि प्रशासकीय समन्वयाबाबत संस्थानने काही सूचना केल्या होत्या. या संदर्भात १२ एप्रिलपर्यंत कोणतीही अधिकृत हमी देणारा प्रस्ताव मंदिर प्रशासनाकडून प्राप्त झालेला नाही. यामुळे वारकरी समाजाला सोयी - सुविधांची खात्री देता येत नसल्याचे कारण सांगत वेळापत्रक प्रसिद्ध करणे तूर्तास स्थगित करण्यात आले आहे.

या गंभीर विषयावर तोडगा काढण्यासाठी प्रशासकीय अधिकारी, लोकप्रतिनिधी, भवानी पेठ विठ्ठल मंदिर विश्वस्त, दिंडी संघटनांचे पदाधिकारी आणि संस्थानचे प्रतिनिधी यांची संयुक्त बैठक पुढील आठ दिवसांत आयोजित केली जाणार आहे. या बैठकीत होणाऱ्या चर्चेनंतर जो प्रस्ताव समोर येईल, तो २६ एप्रिल रोजी पंढरपूर येथे होणाऱ्या बैठकीत वारकरी समाजासमोर चर्चेसाठी ठेवला जाईल. या सर्व प्रक्रियेनंतर अखेर १ मे २०२६ रोजी आळंदी येथे आषाढी वारीची अधिकृत कार्यक्रम पत्रिका आणि वेळापत्रक जाहीर केले जाणार असल्याची माहिती संस्थान समितीच्या वतीने प्रमुख विश्वस्त डॉ. भावार्थ देखणे, पालखी सोहळा प्रमुख ॲड. राजेंद्र उमाप, विश्वस्त योगी निरंजनाथ, चैतन्य महाराज लोंढे, ॲड. रोहिणी पवार, पुरुषोत्तम महाराज पाटील यांनी दिली आहे.