Pune Crime : मैत्रिणीकडे पाहून गाणे गायले; गैरसमजातून तरुणाचा खुनाचा प्रयत्न; पाचजण अटकेत

सिंग याने मैत्रिणीकडे पाहून गाणे गायले, असा गैरसमज आरोपी वाशिलकर याचा झाला.

पुणे : मैत्रिणीकडे पाहून गाणे गायल्याच्या गैरसमजातून तरुणावर तीक्ष्ण शस्त्राने वार करून खुनाचा प्रयत्न करण्यात आल्याची घटना एनडीए रस्त्यावरील उत्तमनगर भागात घडली. या प्रकरणी उत्तमनगर पोलिसांनी पाच जणांना अटक केली. प्रिन्स शैलेंद्र सिंग (वय २६, रा. भैरवनाथनगर, कोंढवे धावडे) असे जखमी झालेल्याचे नाव आहे.

या प्रकरणी करण गणपत वाशिलकर (वय ३४), राेहित उर्फ ओजी गणेश मौर्य (वय २४), गणेश सिद्धराम कालदीप (वय २०), आदित्य गणेश पवार आणि बबलू शिवाजी कांबळे (वय २२, रा. सर्व रा. उत्तमनगर) यांना अटक झाली. याबाबत सिंग याने उत्तमनगर पोलिस ठाण्यात फिर्याद दिली आहे. उत्तमनगर भागातील कोंढवा गेट परिसरात प्रिन्स सिंग हा ५ फेब्रुवारी रोजी रात्री दहाच्या सुमारास थांबला होता.

सिंग याने मैत्रिणीकडे पाहून गाणे गायले, असा गैरसमज आरोपी वाशिलकर याचा झाला. वाशिलकर आणि साथीदार मौर्य, कालदीप, पवार, कांबळे यांनी सिंग याला शिवीगाळ केली. तीक्ष्ण शस्त्राने वार केले. पसार झालेल्या आरोपींना पोलिसांनी अटक केली. पोलिस उपनिरीक्षक कुरेवाड तपास करत आहेत.