Pune Crime: पुणे शहरात एमडी ड्रग्ज रॅकेटचा पर्दाफाश; उत्तमनगर पोलिसांची मोठी कारवाई

- ८.१९ ग्रॅम एमडी जप्त; लाखोंची उलाढाल उघड; ८ पैकी ४ जण अटकेत

पुणे : शहरातील अमलीपदार्थांच्या वाढत्या विळख्यात आणखी एक मोठा गुन्हा उघडकीस आला असून, उत्तमनगर पोलिसांनी एमडी (मेफेड्रॉन) विक्री करणाऱ्या रॅकेटचा पर्दाफाश केला आहे. प्रेमाच्या जाळ्यात अडकवून अल्पवयीन मुलीचे अपहरण करणाऱ्या व १४ गुन्हे दाखल असलेल्या सराईतासह त्याच्या साथीदारांना उत्तमनगर पोलिस तसेच गुन्हे शाखेच्या पथकाने बेड्या ठोकल्या.

या मुलीचे अपहरण करणाऱ्याकडे केलेल्या झडतीत त्याच्याकडून २ एमडीच्या पुड्या सापडल्याने हे मोठे ड्रग रॅकेट उघड झाले आहे. ड्रग्ज विक्री करणारे तसेच ते घेणारे अशा ७६ जणांची माहिती पोलिसांकडे आली आहे. सुनील गोपाळ राठोड ऊर्फ राठ्या राठोड (२८), राजन गोपाल नायर (३७), जतीन जयवंत कदम (२६, रा. वारजे) व शुभम संतोष दहिभाते (२८, रा. कोंढवे धावडे) अशी अटक करण्यात आलेल्यांची नावे आहेत.

पोलिसांनी दिलेल्या माहितीनुसार, उत्तमनगर पोलिस ठाण्यात एका १७ वर्षीय मुलीचे अपहरण झाल्याप्रकरणी गुन्हा नोंद झाला होता. मुलगी प्रेम प्रकरणातून घरातून गेल्याचे समजले होते. गेल्या काही महिन्यांपासून या गुन्ह्यातील आरोपी राठ्या राठोड हा फरार होता. वरिष्ठ पोलिस निरीक्षक राघवेंद्रसिंह क्षीरसागर यांच्याकडून हद्दीतील सराईतांची परेड घेण्यात आली होती, तेव्हा त्यांनी हद्दीत काही बेकायदेशीर होत असेल तर कळवण्याचे सुचवले होते. त्यानंतर, पोलिस निरीक्षक क्षीरसागर यांना माहिती मिळाली की, अपहरणाच्या गुन्ह्यातील राठ्या हा ड्रग्जमध्ये असून, तो अधून-मधून कोंढवे धावडे परिसरात येतो. त्याचवेळी पोलिसांनी त्याचा शोध घेतला.

राठ्या राठोड याला कोंढवे धावडे येथे आल्यानंतर पकडले असता त्याची झडती घेतली तेव्हा त्याच्याकडून एमडीच्या पुड्या सापडल्या. त्याला ताब्यात घेऊन चौकशी सुरू केली. तपासात त्याने अनेक मुलांना ड्रग्ज विक्री केल्याचे तसेच तीन जणांकडून विकत घेतल्याचे समजले. ड्रग विक्रीसाठी केलेला ऑनलाइन व्यवहारही पोलिसांच्या हाती लागला आहे. पोलिसांनी ८.१९ ग्रॅम एमडी आणि दुचाकी असा २ लाख ३६ हजार ५०० रुपयांचा ऐवज जप्त केला आहे. याप्रकरणी उत्तमनगर पोलिस ठाण्यात एनडीपीएस ॲक्ट अंतर्गत स्वतंत्र गुन्हा नोंद करण्यात आला आहे.

२५० ते ३०० जणांकडून पैशांची देवाण-घेवाण...

राड्या राठोडच्या झडतीत ३ ग्रॅम एमडी व दोन मोबाइल जप्त करण्यात आले. पुढील तपासात मोबाइल व्यवहारातून सुमारे १० लाख रुपयांची उलाढाल झाल्याचे उघड झाले. तसेच २५० ते ३०० लोकांकडून पैशांची देवाणघेवाण झाल्याचे समोर आले आहे. या प्रकरणात आरोपींनी एमडी ड्रग्जची विक्री करत असल्याचे निष्पन्न झाले असून, शुभम दहिभाते, राजन नायर, जतिन कदम यांच्यासह इतर आरोपींचा सहभाग आढळला आहे. पुढील कारवाई करत पोलिसांनी शुभम दहिभाते याच्या घरातून ५.१९ ग्रॅम एमडी जप्त केले. आरोपींना न्यायालयाने ८ एप्रिलपर्यंत पोलिस कोठडी सुनावली आहे.

या पोलिस अधिकारी-कर्मचाऱ्यांचा समावेश..

ही कामगिरी पोलिस आयुक्त अमितेश कुमार, सहआयुक्त रंजन कुमार शर्मा, अपर आयुक्त राजेश बनसोडे, पोलिस उपायुक्त संभाजी कदम, गुन्हे शाखेचे उपायुक्त निखिल पिंगळे यांच्या मार्गदर्शनाखाली उत्तमनगर पोलिस ठाण्याचे वरिष्ठ निरीक्षक राघवेंद्रसिंह क्षीरसागर, उपनिरीक्षक चेतन धनवडे, अक्षय पाटील, मुकेश कुरेवाड, पोलिस कर्मचारी प्रदीप शेलार, पृथ्वीराज गायकवाड, चेतन बराटे, परमेश्वर पाडळे, अनिरुद्ध गायकवाड आणि ज्ञानेश्वर तोडकर यांच्या पथकाने केली.