व्यापाऱ्यांकडून खंडणी उकळल्याप्रकरणी बंडू, शिवम आंदेकरची धुळे कारागृहात रवानगी 

गणेश पेठेतील मासळी बाजारातील व्यापाऱ्यांकडून खंडणी उकळल्याप्रकरणी आरोपी बंडू आंदेकर व त्याचा पुतण्या शिवम आंदेकरला ‘मकोका’ न्यायालयाचे विशेष न्यायाधीश एस. आर. साळुंखे यांनी न्यायालयीन कोठडी सुनावली

पुणे : गणेश पेठेतील मासळी बाजारातील व्यापाऱ्यांकडून खंडणी उकळल्याप्रकरणी आरोपी बंडू आंदेकर व त्याचा पुतण्या शिवम आंदेकरला ‘मकोका’ न्यायालयाचे विशेष न्यायाधीश एस. आर. साळुंखे यांनी न्यायालयीन कोठडी सुनावली. त्यामुळे त्यांचा मुक्काम धुळे कारागृहात असणार आहे.

आरोपींच्या पोलिस कोठडीची मुदत संपत आल्याने त्यांना शुक्रवारी (दि. २८) न्यायालयात हजर करण्यात आले. सरकार पक्षाच्या वतीने विशेष सरकारी वकील विलास पटारे यांनी युक्तिवाद केला. आरोपींच्या वतीने ॲड. मिथुन चव्हाण, ॲड. ए. एस. धीवार आणि ॲड. गणेश माने यांनी बाजू मांडली. न्यायालयाने सरकार पक्षाचे युक्तिवाद ऐकून घेत दोघांना न्यायालयीन कोठडी सुनावली.

आंदेकर टोळीने आणली १५ पिस्तुले...

आंदेकर टोळीने उमरटी येथून तब्बल पंधरा पिस्तुले विकत आणल्याचे आतापर्यंतच्या तपासात समोर आले असल्याची माहिती पोलिस आयुक्त अमितेश कुमार यांनी दिली. त्यातील काही पिस्तुले पोलिसांनी जप्त केली आहेत. काही पिस्तुले अद्याप मिळालेली नाहीत. त्यामुळे ती पिस्तुले कोणाकडे आहेत, याचा तपास सुरू असल्याचेही त्यांनी स्पष्ट केले. दरम्यान, विमानतळ पोलिसांकडे दाखल असलेल्या आर्म ॲक्टच्या गुन्ह्यात बंडू आंदेकर याला आरोपी करणार असल्याचे पोलिसांनी सांगितले.