सांगवीत उधार सिगारेटच्या वादातून थरार कोयत्याने हल्ला; वयोवृद्ध महिलेसह चारजण जखमी 

या प्रकरणी संपूर्ण कुटुंबावर गुन्हा दाखल करण्यात आला असून, चारजण जखमी झाले आहेत.

सांगवी : उधार सिगारेट न दिल्याच्या रागातून सुरू झालेला किरकोळ वाद थेट कोयत्याच्या हल्ल्यापर्यंत गेल्याची धक्कादायक घटना सोमवारी (दि. १९) बारामती तालुक्यातील सांगवी येथे घडली. या प्रकरणी संपूर्ण कुटुंबावर गुन्हा दाखल करण्यात आला असून, चारजण जखमी झाले आहेत.

प्रतीक सुनील जगताप (रा. सांगवी, ता. बारामती) यांनी याबाबत माळेगाव पोलिस ठाण्यात फिर्याद दिली आहे. सांगवी बसस्थानकाजवळ फिर्यादी प्रतीक जगताप यांची पानटपरी आहे. आरोपी अभिषेक महादेव जगताप हा त्यांच्या टपरीवर उधार सिगारेट मागण्यासाठी गेला होता. सिगारेट न दिल्याने संतप्त झालेल्या अभिषेकने शिवीगाळ करत प्रतीकला लाथाबुक्क्यांनी मारहाण केली.

ही बाब फिर्यादीचा लहान भाऊ सार्थक जगताप याला समजताच दोघे भाऊ आरोपीचे वडील महादेव जगताप यांच्याकडे जाब विचारण्यासाठी गेले. मात्र, महादेव जगताप, त्यांची पत्नी गीता जगताप आणि मुलगी काजल जगताप यांनी कोणतेही म्हणणे ऐकून न घेता शिवीगाळ व दमदाटी करत लाथाबुक्क्यांनी मारहाण केली. भांडण वाढल्याचा आवाज ऐकून फिर्यादीचे वडील सुनील जगताप भांडण सोडवण्यासाठी आले.

यावेळी आरोपी अभिषेक जगताप याने घरातून कोयता आणून सुनील जगताप यांच्या डोक्यात पाठीमागून वार केला. वडिलांना वाचवण्यासाठी सार्थक पुढे गेला असता त्याच्याही डोक्यावर कोयत्याने वार करण्यात आला. बचाव करताना त्याच्या करंगळीला गंभीर जखम झाली.

दरम्यान, घटनास्थळी आलेल्या फिर्यादीच्या आजी उषा मानसिंग जगताप यांना गीता जगताप व काजल जगताप यांनी ढकलून दिल्याने त्या पडून जखमी झाल्या. या मारहाणीत सुनील जगताप, सार्थक जगताप आणि फिर्यादी प्रतीक जगताप जखमी झाले असून, त्यांना प्रथम सांगवी येथील आरोग्य केंद्रात उपचार देण्यात आले. त्यानंतर पुढील उपचारासाठी त्यांना बारामती येथील शासकीय रुग्णालयात दाखल करण्यात आले आहे.

या प्रकरणी अभिषेक महादेव जगताप, महादेव विश्वनाथ जगताप, गीता महादेव जगताप आणि काजल महादेव जगताप (सर्व रा. सांगवी, ता. बारामती) यांच्याविरोधात माळेगाव पोलिस ठाण्यात गुन्हा दाखल करण्यात आला असून, पुढील तपास सुरू आहे.