Pune Crime: वारजे चौकात वळण घेताना प्लास्टर शीट्सने भरलेला ट्रक पलटी; सुदैवाने अनर्थ टळला

अपघातानंतर ट्रकमध्ये भरलेल्या प्लास्टर ऑफ पॅरिसच्या शीट्स तातडीने बाहेर काढून दुसऱ्या ट्रकमध्ये हलवण्यात आल्या.

शिवणे : वारजे सेवा रस्त्याकडून शिवणे–उत्तमनगरच्या दिशेने जाणारा ट्रक (एमएच १२ बीएफ ०९७५) वारजे येथील स्व. आमदार रमेश वांजळे चौकात वळण घेताना शनिवारी (दि. २८) अचानक उलटला. हा चौक अत्यंत वर्दळीचा असल्याने मोठा अपघात होण्याची शक्यता होती. मात्र सुदैवाने त्या वेळी चौकात कोणतीही गर्दी नसल्याने कोणालाही इजा झाली नाही आणि जीवितहानी टळली.

अपघातानंतर ट्रकमध्ये भरलेल्या प्लास्टर ऑफ पॅरिसच्या शीट्स तातडीने बाहेर काढून दुसऱ्या ट्रकमध्ये हलवण्यात आल्या. दरम्यान, ऐन चौकात ट्रक उलटल्यामुळे काही काळ वाहतूक पूर्णपणे विस्कळीत झाली होती. घटनेची माहिती मिळताच स्थानिक प्रशासन आणि वाहतूक पोलिस घटनास्थळी दाखल झाले.

त्यांनी तत्काळ वाहतूक सुरळीत करण्यासाठी प्रयत्न सुरू केले. क्रेनच्या मदतीने उलटलेला ट्रक बाजूला करण्यात आला आणि काही वेळातच वाहतूक पुन्हा पूर्ववत करण्यात आली. या घटनेमुळे पुन्हा एकदा चौकातील वाहतूक व्यवस्थापन आणि मोठ्या वाहनांच्या वेगावर नियंत्रण ठेवण्याची गरज अधोरेखित झाली आहे.