कात्रज-कोंढवा रस्त्यावर २५ ते ३० कार्यकर्ते घेऊन आंदोलन; वसंत मोरेंवर गुन्हा दाखल

आम्ही आंदोलने करायची का नाहीत? असं काय आंदोलन केले होते की गुन्हा दाखल करण्यात आला, वसंत मोरेंचा सवाल

कात्रज: शनिवारी कात्रज चौक तसेच कात्रज कोंढवा रोड या ठिकाणी पुणे महानगरपालिका आयुक्त महानगरपालिकेचे अधिकारी तसेच आमदार योगेश टिळेकर यांचा पाहणी दौरा होता. यादरम्यान शिवसेना उद्धव ठाकरे गटाचे नेते वसंत मोरे यांच्याकडून २५ ते ३० कार्यकर्ते घेऊन आंदोलन करण्यात आले होते.

या आंदोलनादरम्यानवसंत मोरे व त्यांच्यासोबत असलेल्या समर्थकांनी घोषणाही दिल्या होत्या.कात्रज चौकातील संजय गुगळे यांची ३९ गुंठे जागा पालिकेने ताब्यात घेऊन मोबदला म्हणून २१ कोटी दिले.मात्र प्रत्यक्षात जागेवर ३९ गुंठे क्षेत्र भरत नसून पन्नास वर्षांपूर्वी ताब्यात आलेल्या पंपिंग स्टेशन व राजीव गांधी प्राणी संग्रहालयाची जागेचे पैसे दिले का ?पालिकेने पैसे दिलेली जागा मोजून दाखवावी.या सर्व प्रकारची वरिष्ठ स्तरावर चौकशी करून दोषींवर कारवाई करावी.तसेच १९७२ मध्ये कात्रज गावठाण लगतचा दुष्काळात तयार झालेला आणि उपयुक्त रस्ता निवासी झोन होतो कसा.गावाचा रस्ता बंद करण्याची दिवा स्वप्न पाहू नका असा इशारा शिवसेना उबाठा चे नेते वसंत मोरे यांनी दिला होता . तसेच उपस्थित अधिकाऱ्यांना याचा जाब विचारण्यात आला होता. त्यानंतर वसंत मोरे यांच्यावर भारती विद्यापीठ पोलीस स्टेशन येथे कोणतिही परवानगी न घेता आंदोलन केल्याबद्दल जमावबंदी अंतर्गत गुन्हा दाखल करण्यात आला आहे.

काल जो पुणे महानगरपालिका आयुक्त व आमदार योगेश टिळेकर यांचा दौरा होता. त्यासाठी आमचा विरोध नव्हता. स्थानिक लोक प्रतिनिधी म्हणून सर्वपक्षीय नगरसेवकांना यांनी का डावलले. मागील पंधरा वर्षापासून आम्ही कात्रज व परिसरात दिवस रात्र झटून कामे करत आहोत ते यांना दिसत नाही का. कात्रज मध्ये यांचं काय योगदान आहे हे यांनी दाखवून द्यावं. मागील अनेक वर्षापासून कात्रज कोंढवा रोड रखडला आहे. त्याचे अपयश झाकण्यासाठी हे या गोष्टी करत आहेत का? एवढे वर्ष तुम्हाला कात्रज कोंढवा रोड दिसला नाही का? आम्ही आंदोलने करायची का नाहीत असं काय आंदोलन केले होते की गुन्हा दाखल करण्यात आला.- वसंत मोरे, नेते शिवसेना ( उद्धव बाळासाहेब ठाकरे)