महिला पोलीस अधिकाऱ्याशी गैरवर्तन प्रकरण; भाजप पदाधिकाऱ्यावर विनयभंगाचा गुन्हा दाखल

याबाबत महिला पोलिस अधिकाऱ्याने फरासखाना पोलिस ठाण्यात फिर्याद दिली आहे. त्यांनी दिलेल्या फिर्यादीनुसार, प्रमोद कोढरे (रा. नातूबाग, सदाशिव पेठ, बाजीराव रस्ता) याच्याविरोधात गुन्हा दाखल करण्यात आला आहे.

पुणे : वरिष्ठ महिला पोलिस अधिकाऱ्याशी अश्लील वर्तन केल्याप्रकरणी भारतीय जनता पक्षाचा पदाधिकारी प्रमोद कोंढरे याच्याविरोधात विनयभंगाचा गुन्हा फरासखाना पोलिसांकडून दाखल करण्यात आला. केंद्रीय मंत्री नितीन गडकरी हे सोमवारी (दि.२३) पुणे दौऱ्यावर आले होते. त्यावेळी बंदोबस्तात असलेल्या वरिष्ठ पोलिस अधिकाऱ्याला अयोग्य पद्धतीने स्पर्श केल्याचे फिर्यादीत म्हटले आहे.

याबाबत महिला पोलिस अधिकाऱ्याने फरासखाना पोलिस ठाण्यात फिर्याद दिली आहे. त्यांनी दिलेल्या फिर्यादीनुसार, प्रमोद कोढरे (रा. नातूबाग, सदाशिव पेठ, बाजीराव रस्ता) याच्याविरोधात गुन्हा दाखल करण्यात आला आहे.

फिर्यादीमध्ये छत्रपती शिवाजी मार्गावरील प्रस्तावित भुयारी मार्गाचे पाहणी दौऱ्यासाठी केंद्रीय वाहतूक मंत्री नितीन गडकरी हे सोमवारी पुण्यात आले होते. शहरात गडकरी यांचे विविध कार्यक्रम होते. त्यानिमित्ताने छत्रपती शिवाजी रस्त्यावर बंदोबस्त ठेवण्यात आला होता. या कार्यक्रमासाठी भाजपचे कसबा मतदारसंघाचे आमदार हेमंत रासने उपस्थित होते. कार्यक्रमापूर्वी सकाळी दहाच्या सुमारास रासने कार्यकर्त्यांसोबत शनिवारवाडा परिसरात थांबले होते. कार्यक्रम सुरू होण्यास वेळ होता. त्यामुळे रासने हे कार्यकर्त्यांसह कसबा पेठ चौकी परिसरात असलेल्या एका उपाहारगृहात चहा प्यायला गेले. त्यावेळी मी तेथे होते. रासने यांनी मला चहा पिण्याचा आग्रह केला. माझ्यासोबत असलेल्या पोलिस कर्मचाऱ्यांसोबत मी चहा प्यायला उपाहारगृहात गेले. त्यावेळी रासने आणि कार्यकर्ते उपहारगृहासमोर थांबले होते. तेथे गर्दी झाली होती, असे महिला पोलिस अधिकाऱ्याने दिलेल्या फिर्यादीत म्हटले आहे.

त्यावेळी तेथे असलेला प्रमोद कोंढरे हा माझ्याकडे वेगळ्या नजरेने पाहत होता. ही बाब मला खटकली होती. मात्र, बंदोबस्तास असल्याने मी दुर्लक्ष केले. चहा पिल्यानंतर मी रासने यांच्याशी थोड्या वेळ चर्चा केली. तेथून जात असताना मला कोणीतरी अयोग्य पद्धतीने स्पर्श केल्याचे जाणवले. मी मागे वळून पाहिले, तेव्हा ती व्यक्ती प्रमोद कोंढरे होती. त्यावेळी बंदोबस्तात असल्याने मी दुर्लक्ष केले. त्यानंतर पोलिस आयुक्त कार्यालयातील बैठक पार पाडून मी नवी पेठेतील एस.एम. जोशी सभागृहात आयोजित करण्यात आलेल्या कार्यक्रमास गेले. बंदोबस्तावेळी किळसवाणी घटना घडल्याने मी अस्वस्थ झाले होते. त्यानंतर मी कसबा पेठ पोलिस चौकी परिसरातील उपहारगृह परिसरात गेले. तेथील सीसीटीव्ही कॅमेऱ्यांंनी केलेले चित्रीकरण तपासले. तेव्हा कोंढरे याने अयोग्य पद्धतीने स्पर्श केल्याचे चित्रीकरणात दिसून आले. बंदोबस्त आटोपल्यानंतर मी या घटनेची वरिष्ठ पोलिस अधिकाऱ्यांना या घटनेची माहिती दिली, असे त्यांनी फिर्यादीत म्हटले आहे.

यापूर्वी प्रमोद कोंढरे याच्याविरोधात २०१५ मध्ये खडक पोलिस ठाण्यात धमकावून वर्गणी मागितल्याप्रकरणी गुन्हा दाखल करण्यात आला होता. २०१० आणि २०११ मध्ये कोंढरे विरोधात विश्रामबाग पोलिस ठाण्यात गुन्हे दाखल करण्यात आले होते. डेक्कन पोलिस ठाण्यात देखील २०२२ मध्ये त्याच्यावर विनयभंगाचा गुन्हा दाखल करण्यात आला होता.