Pimpri Chinchwad : माणला प्लॉट विक्रीच्या बहाण्याने ३२ लाखांची फसवणूक  

पिंपरी : जमीन विकण्याचे आमिष दाखवून एकाकडून ३२ लाख रुपये घेऊन फसवणूक केल्याचा प्रकार उघडकीस आला आहे. ही घटना १० जानेवारी २०२१ ते १६ जानेवारी २०२३ या कालावधीत माण (ता. मुळशी) येथे घडली. गुरुवारी (२९ जानेवारी) गुन्हा दाखल झाला आहे.

हिंजवडी पोलिसांनी दिलेल्या माहितीनुसार, याप्रकरणी ओंकार अशोक आष्टेकर (वय ३५, कोथरूड, पुणे) यांनी हिंजवडी पोलिस ठाण्यात फिर्याद दिली आहे. त्यानुसार एका महिलेच्या (हिंजवडी, ता. मुळशी) विरोधात गुन्हा दाखल करण्यात आला आहे.

संशयित महिलेने फिर्यादीस माण येथील मल्हार पार्कमधील प्लॉट नंबर १२ विकण्याचे कबूल केले होते. त्यासाठी बँक ट्रान्सफरद्वारे चार लाख ५३ हजार आणि रोख स्वरूपात २७ लाख ४७ हजार रुपये असे एकूण ३२ लाख रुपये घेतले. व्यवहाराबाबत साठेखत करून दिले, मात्र व्यवहार पूर्ण न झाल्यास खात्री म्हणून दिलेले ३७ लाख रुपयांचे धनादेश वटले नाहीत. जमिनीचा ताबाही दिला नाही, खरेदीखत करून दिले नाही किंवा घेतलेले पैसेही परत न देता विश्वासघात केला. गुरुवारी गुन्हा दाखल झाला आहे.