Pune: एकाने बंदोबस्तात धिंगाणा घातला; दुसऱ्याने नशेत महिलेला उडवले, दारू पिऊन ऑनड्यूटी असणारे २ पोलीस निलंबित

या दोन्ही कर्मचाऱ्यांचे कृत्य महाराष्ट्र नागरी सेवेचे (वर्तणूक) उल्लंघन करणारे आहे. त्यानुसार दोघांना शासकीय सेवेतून निलंबित करण्यात आले आहे.

पुणे : ऑनड्यूटी दारूच्या नशेत वावरणाऱ्या काळेपडळ पोलिस ठाण्यातील दोन पोलिस हवालदारांचे तडकाफडकी निलंबन करण्यात आले. एकाने भरती प्रक्रियेसारख्या संवेदनशील बंदोबस्तात मद्यप्राशन करून धिंगाणा घातला, तर दुसऱ्याने थेट पोलिस ठाण्याच्या आवारातच नशेत गाडी चालवत महिला तक्रारदाराला उडवले. या दोन्ही हवालदारांच्या वर्तणूकीची गंभीर दखल घेत पोलिस उपायुक्त डॉ. राजकुमार शिंदे यांनी त्यांना तडकाफडकी निलंबित करण्याचे आदेश दिले. सचिन सुरेशराव जाधव आणि संजय अंकुश कराड अशी निलंबन करण्यात आलेल्या कर्मचाऱ्यांची नावे आहेत.

पहिली घटना २१ मार्च रोजी लोणी काळभोर येथील एमआयटी (एडीटी) विद्यापीठात घडली. पुणे शहर पोलिस भरती २०२४-२५ ची लेखी परीक्षा सुरू असताना हवालदार सचिन जाधव यांची नियुक्ती इमारत क्रमांक १ मधील सेक्टर १ च्या बंदोबस्तासाठी करण्यात आली होती. सायंकाळी सहाच्या सुमारास वरिष्ठ पोलिस निरीक्षकांनी या बंदोबस्ताची अचानक पाहणी केली. त्यावेळी सचिन जाधव याने कर्तव्यावर असताना मद्यप्राशन करून गैरवर्तन करताना आढळला. संशय आल्याने त्याची ससून रुग्णालयात वैद्यकीय तपासणी करण्यात आली, ज्यामध्ये त्याने मद्यपान केल्याचे निष्पन्न झाले. एका अत्यंत महत्त्वाच्या शासकीय प्रक्रियेत अशा प्रकारे बेजबाबदार वर्तन केल्याने प्रशासनाने त्याची गंभीर दखल घेतली. तर, दुसरी घटना ९ मार्च रोजी घडली, ज्यामध्ये हवालदार संजय कराड याच्यावर कारवाई करण्यात आली. उंड्री पोलिस चौकीत ड्युटी अंमलदार म्हणून कार्यरत असताना कराड दुपारी दोन वाजता आपले कर्तव्य सोडून दुचाकीवरून काळेपडळ पोलिस ठाण्याच्या आवारात आला. यावेळी मद्याच्या नशेत त्याचे दुचाकीवरील नियंत्रण सुटल्याने त्याने पोलिस ठाण्यातील बाकड्यावर बसलेल्या एका महिला तक्रारदाराला धडक दिली. या धडकेत महिला किरकोळ जखमी झाली. त्यानंतरही शुद्धीवर नसलेल्या कराड याने तेथील लोकांशी हुज्जत घालत गैरवर्तन केले. वैद्यकीय अहवालात कराड याने देखील मद्यपान केल्याचे सिद्ध झाले. या दोन्ही कर्मचाऱ्यांचे कृत्य महाराष्ट्र नागरी सेवेचे (वर्तणूक) उल्लंघन करणारे आहे. त्यानुसार दोघांना शासकीय सेवेतून निलंबित करण्यात आले आहे.