सोशल नेटवर्कद्वारे विधानसभेची मोर्चेबांधणी

काही महिन्यांतच विधानसभा निवडणूक येऊन ठेपली आहे. मोदी लाटेत गाजलेल्या लोकसभा निवडणुकीनंतर अनेकांच्या आशा उंचावल्या

पिंपरी : काही महिन्यांतच विधानसभा निवडणूक येऊन ठेपली आहे. मोदी लाटेत गाजलेल्या लोकसभा निवडणुकीनंतर अनेकांच्या आशा उंचावल्या असून, इच्छुकांनी मोर्चेबांधणीला सुरुवातही केली आहे. खडबडून जागे होत दादा, भाऊ, अप्पा, अण्णा, तार्इंनी सोशल मीडियाच्या माध्यमातून लोकांपर्यंत पोहोचण्याचे तंत्र स्वीकारले असून, त्याद्वारे संदेशाचा मारा सुरू झाला आहे. विधानसभेच्या निवडणुकीसाठी केवळ ४ ते ५ महिन्यांचा कालावधी शिल्लक आहे. लोकसभा निवडणुकीचा निकाल लक्षात घेऊन अनेक जण रिंगणात उतरण्याचा तयारीला लागले आहेत. इतका काळ कोठेच दिसत नसलेले अनेक इच्छुक जागे होत ‘अ‍ॅक्टिव्ह’ झाले आहेत. विद्यमान आमदार मंडळीही नव्या दमाने मैदानात उतरली आहेत. इंटरनेटच्या माध्यमातून फेसबुक, ट्विटर तसेच व्हॉट्स अ‍ॅप आणि एसएमएसद्वारे नागरिकांशी संवाद वाढविला जात आहे. तसेच, संकेतस्थळावर स्वतंत्र पेज तयार केले आहे. त्यातून छायाचित्र व संदेश झळकत आहेत. विशेषत: खादीचा गणवेश परिधान केलेल्या आकर्षक भावमुद्रा पाहायला मिळत आहेत. महिला इच्छुकही मागे नसून मोहक रंगांतील साडीमध्ये त्या दिसत आहेत. केलेले काम, विविध प्रकारचे कार्यक्रम, सोहळे, ज्येष्ठ नेत्यांसोबतची छायाचित्रे पोस्ट केली जात आहेत. दररोज सकाळी सुविचार मांडून सर्वांना शुभ सकाळचा संदेश दिला जात आहे. यात खंड पडू दिला जात नाही. सण, उत्सव, महापुरुषांच्या जयंतीला आवर्जून शुभेच्छा दिल्या जात आहेत. अशा कार्यक्रमास उपस्थित राहून त्याची छायाचित्रे व व्हिडीओ प्रसिद्ध केले जात आहेत. आपण प्रभावीपणे काम करत आहोत, हे दाखविण्यासाठी कार्यकर्ते दिवसरात्र व्हॉट्स अ‍ॅपवरील गु्रपचे मॅनेजमेंट करण्यात गर्क आहेत. समर्थकांनी ग्रुप तयार करून संदेशाचा मारा सुरू केला आहे. तयारीला लागा... असा संदेश देत आहेत. (प्रतिनिधी)