‘मी पुण्याकडे जात आहे, तुम्हालाही सोडतो,’ लिफ्टच्या बहाण्याने महिलेला गाडीत बसवून अत्याचार

आरोपीने बंदुकीचा धाक दाखवून तिच्यावर अत्याचार केल्याचा आरोप आहे, तसेच या घटनेची कुठेही वाच्यता करू नये, अशी धमकीही दिल्याचे तक्रारीत नमूद करण्यात आले आहे

कुरकुंभ : पुणे-सोलापूर महामार्गावरील कुरकुंभ येथे भराव पुलाजवळ पुण्याकडे जाणाऱ्या एका महिलेला लिफ्ट देण्याच्या बहाण्याने गाडीत बसवून बंदुकीचा धाक दाखवत अत्याचार केल्याची धक्कादायक घटना उघडकीस आली आहे. याप्रकरणी पीडित महिलेच्या तक्रारीवरून दौंड पोलिसांनी आरोपी अमोल साहेबराव काळे (रा. खडकी, ता. दौंड) याला अटक केली आहे.

दाखल झालेल्या तक्रारीनुसार, पीडित महिला पुण्याकडे जाण्यासाठी पुणे-सोलापूर महामार्गावर भराव पुलाजवळ थांबली होती. त्यावेळी आरोपीने लिफ्ट देण्याचा बहाणा करत तिला गाडीत बसवले. काही अंतर गेल्यानंतर आरोपीने बंदुकीचा धाक दाखवून तिच्यावर अत्याचार केल्याचा आरोप आहे, तसेच या घटनेची कुठेही वाच्यता करू नये, अशी धमकीही दिल्याचे तक्रारीत नमूद करण्यात आले आहे.

पीडित महिला पिंपरी-चिंचवड येथे आपल्या आईला भेटण्यासाठी निघाली होती. भिगवण येथून पिकअप गाडीने ती कुरकुंभपर्यंत आली होती. पुढे पुण्याकडे जाण्यासाठी भराव पुलाजवळ उभी असताना आरोपी अमोल काळे हा क्रमांकाच्या वाहनातून आला. त्याने ‘मी पुण्याकडे जात आहे, तुम्हालाही सोडतो,’ असे सांगून महिलेला गाडीत बसवले आणि काही अंतरावर नेऊन गुन्हा केल्याचे तक्रारीत म्हटले आहे. या प्रकरणाचा पुढील तपास पोलिस उपविभागीय अधिकारी बापूराव दडस करत आहेत.