जीपीएस सिस्टीममुळे इलेक्ट्रिक बाईक चोरटे जाळ्यात; भाड्यानं घेऊन परस्पर करत होते विक्री, ३ तरुण गजाआड

जीपीएसद्वारे बाईकचा माग काढून चोरट्यांना ताब्यात घेऊन बाईक जप्त केल्या

ठळक मुद्दे इलेक्ट्रिक बाईक नाना पेठेतील पिंपरी चौक येथे प्रत्येकी ८ हजार रुपये किंमतीत परस्पर केल्या विक्री

पुणे : आठवड्याभरासाठी इलेक्टिक बाईक भाड्याने घेऊन त्यांची परस्पर विक्री करणाऱ्या तीन तरुणांना समर्थ पोलिसांनीअटक केली आहे. इलेक्ट्रिक बाईक भाड्याने घेतल्यानंतर तिला जीपीएस सिस्टीम बसवल्याचे त्यांना माहितच नव्हते. त्यामुळे ते बिनधास्त या बाईकचा व्यवहार करत होते. समर्थ पोलिसांनी या जीपीएसद्वारे बाईकचा माग काढून चोरट्यांना ताब्यात घेऊन बाईक जप्त केल्या आहेत.

अरीश रेमंड धवर (वय ३१, रा. लक्ष्मी रेसिडेंसी, पठारे वस्ती, लोहगाव), अंबरेश शांतनूर बिदनूर (वय ३३, रा. पठारे वस्ती, लोहगाव) आणि नरेंद्र विजय पुरुड (वय ३७, रा. नाना पेठ) अशी अटक केलेल्यांची नावं आहेत. नरेंद्र पुरुड याचं नाना पेठेत नरेंद्र मोटर्स या नावानं दुचाकी खरेदी विक्रीचं दुकान चालवतो.

धानोरी येथील श्राईड इंडिया प्रा. लि. या दुकानातून तिघांनी १६ ऑगस्टला भाड्याने ३ इलेक्ट्रिक बाईक घेतल्या होत्या. दुकान मालकाने ८ दिवसांसाठी नाना पेठ येथे त्या भाड्याने दिल्या होत्या. भाड्याची मुदत संपल्यानंतर या बाईक परत करणे आवश्यक असताना त्या त्यांनी परत केल्या नाही. त्यामुळं दुकान मालकानं संबंधित व्यक्तिकडे फोनवर संपर्क केला. तेव्हा त्यानं बाईक आज देतो, उद्या देतो, अशी उडवाउडवीची उत्तरे दिली. त्यानंतर फोन बंद केल्यानं  फिर्यादीला त्यांची फसवणूक झाल्याची खात्री झाली. त्यांनी २९ ऑगस्ट रोजी समर्थ पोलीस ठाण्यात फसवणूकीची फिर्याद दिली.

या गुन्ह्याचा तपास करत असताना या इलेक्ट्रिक बाईक नाना पेठेतील पिंपरी चौक येथे प्रत्येकी ८ हजार रुपये किंमतीत परस्पर विक्री केल्या असल्याची माहिती पोलिसांना मिळाली. तसेच या तिन्ही बाईकला जीपीएस सिस्टिम असल्याची या आरोपींना माहिती नव्हती. त्यामुळे ते अगदी बिनधास्तपणे बाईकचा व्यवहार करीत होते. वाहनाची खरेदी विक्री करताना शासनाने निर्गमित केलेल्या आदेशाचे तंतोतंत पालन करुनच व्यापारी व नागरिकांनी व्यवहार करावेत अन्यथा आपली अशाच प्रकारे फसवणूक होऊ शकते, तसेच कायदेशीर कारवाई सुद्धा होऊ शकते, असे आवाहन पोलिसांच्या वतीनं करण्यात आलंय.