अंत्यविधीसाठी कुटुंब परगावी, चोरट्यांनी साधली संधी; वॉशिंग मशीनमधील दागिने-पैसे केले लंपास

या प्रकरणी आंबेगाव पोलीस ठाण्यात अज्ञात व्यक्तींविरोधात गुन्हा दाखल करण्यात आला आहे. 

लोकमत न्यूज नेटवर्क, पुणे: नातेवाईकांच्या अंत्यविधीसाठी परगावी गेलेल्या एका कुटुंबाच्या घरात शिरून वॉशिंग मशीनमध्ये ठेवलेल्या दागिने आणि पैशांवर चोरट्यांनी डल्ला मारल्याची घटना समोर आली आहे. पुण्यातील कात्रज भागात ही घटना घडली असून, या प्रकरणी आंबेगाव पोलीस ठाण्यात अज्ञात व्यक्तींविरोधात गुन्हा दाखल करण्यात आला आहे. 

पुण्यात चक्क वॉशिंग मशीनमध्ये ठेवलेले दागिने आणि रोख रक्कम चोरट्यांनी केली गायब केल्याचे उघडकीस आले आहे. वॉशिंग मशीनमध्ये ठेवलेले ९९ हजार रुपये किंमतीचे दागिने आणि रोख रक्कम चोरट्यांनी चोरून नेले, अशी माहिती मिळाली आहे. ३० वर्षीय व्यक्तीने याबाबत पोलिसात फिर्याद दिली आहे.

घर बंद असल्याचा चोरट्यांनी घेतला गैरफायदा

मिळालेल्या माहितीनुसार, हा सगळा प्रकार पुण्यातील कात्रज भागात असलेल्या सच्चाई माता मंदिर परिसरात २६ नोव्हेंबर ते २८ नोव्हेंबर दरम्यान घडला. फिर्यादी हे त्यांच्या परिवारासह त्यांच्या साडूच्या भावाच्या अंत्यविधीसाठी लातूर जिल्ह्यातील निलंगा येथे गेले होते. घर बंद असल्याचा फायदा घेऊन चोरट्यांनी लॉक केलेला घरचा दरवाजा हत्याराच्या साह्याने तोडला आणि घरात प्रवेश केला. चोरट्यांनी घरात अनेक ठिकाणी हाती काही लागतं आहे का यासाठी शोध घेतला तेव्हा त्यांची नजर घरामध्ये असलेल्या वॉशिंग मशीन कडे गेली. तेव्हा त्यांनी वॉशिंग मशीन उघडली असता त्यात एक डब्बा ठेवल्याचे दिसून आले. या डब्ब्यात सोन्याचे दागिने आणि काही रोख रक्कम फिर्यादी यांनी ठेवली होती.

दरम्यान, पोलिसांनी दिलेल्या माहितीनुसार, या डब्यामध्ये साधारण ९९ हजार रुपये किंमतीचे दागिने आणि काही रोख रक्कम होती. चोरट्यांनी तो दागिन्यांचा डबा घेऊन तिथून पसार झाले. आंबेगाव पोलिसांकडून याचा तपास सुरू आहे.