दारूच्या नशेत अल्पवयीन मुलांकडून वाहनांची तोडफोड; पोलिसांनी दारू देणारे बार केले सील

पोलिसांनी अल्पवयीन मुलांना दारू विक्री करणाऱ्या नशा बारवर कारवाई करीत बार सील केले आहे. तसेच, बारमालक, मॅनेजर, बार काउंटर, दारू देणाऱ्यासह त्या अल्पवयीन मुलांच्या पालकांना गुन्ह्यात सहआरोपी केले

धायरी: सिंहगड रस्ता परिसरातील हिंगणे खुर्द येथे दारूच्या नशेत अल्पवयीन मुलांनी वाहनांची तोडफोड करून दहशत माजविल्याच्या प्रकरणात सिंहगड रस्ता पोलिसांनी मोठी कारवाई केली आहे. पोलिसांनी अल्पवयीन मुलांना दारू विक्री करणारे नशा बारवर कारवाई करीत बार सील केले आहे. तसेच, बारमालक, मॅनेजर, बार काउंटर, दारू देणाऱ्यासह त्या अल्पवयीन मुलांच्या पालकांना गुन्ह्यात सहआरोपी केले आहे.

याबाबत अधिक माहिती अशी की, तीन दिवसांपूर्वी दोन अल्पवयीन मुलांसह त्याच्या साथीदारांनी हिंगणे खुर्द, वडगाव बुद्रुक येथील तुकाईनगरमध्ये ‘आम्हीच या भागातील भाई’ म्हणत गोंधळ घालत २० ते २२ वाहनांची तोडफोड केली होती. तर, एका तरुणावर कोयत्याने हल्ला केला होता. या प्रकरणी सिंहगड रस्ता पोलिसांनी अल्पवयीन मुलांना पकडले होते. तर, त्यांचा साथीदार साई पांडुरंग उमाप (१८, रा. समर्थनगर) याला अटक केली होती. पोलिसांनी गुन्ह्याचा सखोल तपास केल्यानंतर चौघे जण दारू प्यायले असल्याचे समोर आले होते. चौकशीत या तिघांनी वडगाव बुद्रुक येथील हॉटेल नशा बारमधून दारू घेतली. त्यानंतर ते दारू प्यायले असल्याचे समोर आले. त्यानंतर त्यांनी दहशत माजवून वाहनांची तोडफोड केल्याचे समोर आले. त्यानुसार पोलिसांनी सीसीटीव्ही व इतर माहितीवरून चौकशी केली. नंतर बार मालकांसह मॅनेजर व दारू देणाऱ्यांना या गुन्ह्यात आरोपी करण्यात आले आहे. पोलिसांनी मॅनेजर, दारू देणारा व बार काउंटर यांना अटक केली, तर बार मालक पसार झाला आहे. पोलिस उपायुक्त संभाजी कदम, सिंहगड रस्ता पोलिस ठाण्याचे वरिष्ठ पोलिस निरीक्षक दिलीप दाइंगडे, गुन्हे निरीक्षक उत्तम भजनावळे यांच्या मार्गदर्शनाखाली पोलिस उपनिरीक्षक सुरेश जायभाय हे तपास करीत आहेत.

बारमालकांचे धाबे दणाणले...

कायद्याने अल्पवयीन मुलांना दारू न देण्याबाबत नियम आहे. अल्पवयीन मुलाला दारू दिली म्हणून पोलिसांनी बारवर कारवाई केल्याने बारचालकांचे धाबे दणाणले असून, या प्रकरणी सिंहगड रस्ता पोलिसांमध्ये वाहन तोडफोड, दहशत माजवणे, आर्म ॲक्टनुसार गुन्हा नोंदवत दोन अल्पवयीन मुलांसह एका आरोपीला अटक केली होती. गुन्ह्यात अल्पवयीन मुलाचे वडील धर्मा सरोदे (७५), दुसऱ्या एका मुलाची आई तसेच नशा बारचे मालक/चालक तसेच बार मॅनेजर अनिल विनायक सूर्यवंशी, बार काउंटर विनोद दत्ता कांबळे, दारू विकत घेऊन देणारा कालिदास नायकवाडी यांचा गुन्ह्यात समावेश करण्यात आला आहे.