पुणे शहराच्या सांडपाण्यात आढळला कोरोना विषाणू; राष्ट्रीय रासायनिक प्रयोगशाळेकडून तपासणी

शहरातील बहुतांश सांडपाणी प्रकल्पांतील पाण्यात मे महिन्यापासून या विषाणूचे अंश मोठ्या संख्येने आढळून येत आहेत

पुणे : राष्ट्रीय रासायनिक प्रयोगशाळेने केलेल्या तपासणीतून शहरातील सांडपाण्यात कोरोना विषाणूचे अंश आढळून आले आहेत. दि. २२ एप्रिल रोजी शहरातील केवळ एका सांडपाणी प्रक्रिया प्रकल्पातील पाण्यात कोरोना विषाणूचे अंश आढळून आले होते. मात्र, राष्ट्रीय रसायन प्रयोगशाळेने (एनसीएल) मे महिन्यात केलेल्या तपासण्यांमध्ये कोरोना विषाणूचे अंश आढळून येण्याचे प्रमाण वाढल्याचे निदर्शनास आले आहे. शहरातील बहुतांश सांडपाणी प्रकल्पांतील पाण्यात मे महिन्यापासून या विषाणूचे अंश मोठ्या संख्येने आढळून येत आहेत.

यापूर्वी याच प्रकल्पामार्फत ओमिक्रॉन आणि त्याच्या उपप्रकारांमुळे संसर्गात झालेली वाढ निदर्शनास आली होती. राष्ट्रीय रासायनिक प्रयोगशाळा व पुणे नॉलेज क्लस्टरच्या वतीने काेरोना काळात ऑगस्ट २०२१ मध्ये हा प्रकल्प सुरू करण्यात आला. या प्रकल्पामार्फत शहरातील सुमारे दहा सांडपाणी प्रक्रिया प्रकल्पांमधील पाण्याची नियमित तपासणी केली जाते. प्रत्येक आठवड्याला सांडपाणी नमुने तपासण्यात येतात. या तपासणीत एप्रिलमध्ये केवळ एका प्रकल्पातील सांडपाण्यात कोरोना विषाणूचे अंश आढळून आले होते. त्यानंतर दि. ६ मेपासून सर्व दहा सांडपाणी प्रकल्पांतील पाण्यात कोरोना विषाणूचे अंश आढळून येण्यास सुरुवात झाली आहे. साथरोगांची पूर्वसूचना मिळण्यासाठी सांडपाणी सर्वेक्षण प्रकल्प महत्त्वपूर्ण ठरत आहे. सांडपाणी तपासणीत आढळलेल्या निष्कर्षांची माहिती ‘एनसीएल’कडून आरोग्य विभागाला दिली जात असल्याने तातडीने उपाययोजना करणे शक्य झाले आहे.

विषाणूंच्या अंशांच्या प्रमाणातून समजते संसर्गाची तीव्रता

शहरातील मैलामिश्रित सांडपाण्यात आजाराचा संसर्ग झालेल्या नागरिकांमधील मृत विषाणूंचे अंश मिसळलेले असतात. अशा पाण्याची तपासणी केल्यास त्यातील विषाणूंचे अंश आढळून येतात. तपासणीअंती सांडपाण्यात एखाद्या विषाणूच्या अंशाचे प्रमाण किती आहे, यावर त्या संसर्गाचा प्रसार आणि तीव्रता लक्षात येते. एखाद्या परिसरातील सांडपाण्यात विषाणूचे प्रमाण जास्त आढळल्यास त्या भागात त्या विषाणूचा संसर्ग किती तीव्र आहे, याचा निष्कर्ष काढला जातो.