अपूर्ण आळेफाटा बायपासने घेतला दुचाकीस्वाराचा बळी

दरम्यान गेल्या अनेक वर्षांपासून बायपासचे काम अपूर्ण अवस्थेत असल्याने मोठ्या प्रमाणात अपघात होऊ लागले आहेत

आळेफाटा : आळेफाटा( ता.जुन्नर) येथील अपूर्ण असलेल्या बायपसामुळे अपघात झाल्याने यामध्ये एका दुचाकीस्वाराचा जागीच मृत्यू झाला आहे. ही घटना रविवारी( दि १०) रोजी सकाळी साडेअकरा वाजेच्या सुमारास घडली. सुनिल जिजाबा कोरडे (वय-45 रा. बोरी) असे अपघातातमृत्यू झालेल्या व्यक्तिचे नाव आहे.

याबाबत आळेफाटा पोलिसांकडून मिळालेली माहिती अशी की, रविवारी सकाळी साडेअकरा वाजेच्या सुमारास मालवाहू ट्रक हा ओतूरकडून नाशिकच्या दिशेने जात होता. त्याच दरम्यान सुनिल कोरडे हे दुचाकीवरून वडगाव आनंद येथून बोरी गावाकडे जात होते. ही दोन्ही वाहने बायपास जवळ आले असता. ट्रक चालकाने पाठीमागून येणाऱ्या दुचाकीला न बघता नाशिकच्या दिशेने जोराने वाहन वळवले आणि अपघात झाला. त्यामध्ये सुनिल कोरडे यांचा मृत्यू झाला आहे. दरम्यान गेल्या अनेक वर्षांपासून बायपासचे काम अपूर्ण अवस्थेत आहे. त्यामुळे मोठ्या प्रमाणात अपघात होऊ लागले आहे. याच ठिकाणी गतिरोधकही टाकण्यात आला आहे. मात्र तो चुकीच्या पद्धतीने टाकल्याने छोटे- मोठे अपघातही रोज होत आहे.