बारामती दूध संघाचे नामांतर; 'सहकारमहर्षी अजितदादा पवार सहकारी दूध उत्पादक संघ मर्यादित' नाव निश्चित

उपमुख्यमंत्री अजित पवार यांच्या मार्गदर्शनाखाली बारामती दूध संघाचे कामकाज सुरु होते, त्यांच्याच मार्गदर्शनाखाली संघाची नेहमीच उत्तरोउत्तर प्रगती झाली

बारामती: कात्रज दूध संघाच्या निर्णयानंतर आता बारामती तालुका दुध उत्पादक संघाने संचालक मंडळाच्या बैठकीत महत्वपुर्ण निर्णय घेतला आहे. संस्थेच्या नावाचे नामांतर करण्यात आले. बारामती दुध संघ आता सहकार महर्षी अजितदादा पवार सहकारी दूध उत्पादक संघ मर्यादित या नावाने ओळखला जाणार आहे.याबाबत संघाचे चेअरमन संजय रामचंद्र कोकरे, व्हा.चेअरमन दत्तात्रय सदाशिव वावगे यांनी माहिती दिली. यावेळी संघाचे सर्व संचालक मंडळ, संघाचे व्यवस्थापकीय संचालक डॉ. योगेश राणे, उपमहाव्यवस्थापक अमोल चव्हाण उपस्थित होते. 

अधिक माहिती देताना त्यांनी सांगितले की, दिवंगत उपमुख्यमंत्री अजित पवार यांच्या मार्गदर्शनाखाली बारामती दूध संघाचे कामकाज सुरु होते. त्यांच्याच मार्गदर्शनाखाली संघाची नेहमीच उत्तरोउत्तर प्रगती झाली. संस्थेने विविध प्रकल्प उभारले. दुधउत्पादक शेतकऱ्यांना त्यांनी नेहमीच पाठबळ दिले. सहकार क्षेत्राला त्यांनी दिलेलं बळ मोलांच आहे. त्यांच्या योगदानाचा सन्मान करण्यासाठी तसेच त्यांची आठवण कायम स्मरणात राहावी याकरिता संचालक मंडळाच्या बैठकीत बारामती दूध संघाचे नांव सहकारमहर्षी अजितदादा पवार सहकारी दूध उत्पादक संघ मर्यादित, असे करण्यात आले आहे.

संघाचे पॅकींग दूध व दूग्धजन्य पदार्थ "नंदन" ब्रँडने विविध शहरांमध्ये विकी होते. पॅकींग दूध, पुणे, लोणावळा, अहिल्यानगर, संभाजीनगर, मुंबई, रोहा, महाड, सोलापूर या विविध शहरामध्ये विक्री होते. तसेच पुणे व मुंबई येथील नामांकित हॉटेल्स्, कार्पोरेट ऑफिस, विविध नामांकित कंपन्या, हॉस्पीटल्स् इत्यादी ठिकाणी नंदन पाऊच पॅकींग दूध व दूग्धजन्य पदार्थाची विक्री केली जात आहे. संघामार्फत शेतकर्यांच्या दुधाचे दूग्धजन्य पदार्थामध्ये सध्या श्रीखंड, आम्रखंड, पनीर, दही, ताक, लस्सी, तूप, बासुंदी, पेढा, कलाकंद, खवा इत्यादी दुग्धपदार्थाचे उत्पादन घेतले जात आहे. संघाच्या दूग्धपदार्थाला ग्राहकांची चांगली पसंती असून मोठया प्रमाणावर मागणी आहे. संघाच्या दूध उत्पादक शेतक-यांसाठी योग्य व वाजवी किंमतीत नंदन सुप्रिम, नंदन गोल्ड, नंदन गोल्ड प्लस, नंदन सिलव्हर, नंदन काफस्टार्टर, नंदन गर्भसत्व इत्यादी पशुखाद्य तसेच नंदन मिल्कमीन मिनरल मिक्चर), इत्यादी प्रकारचे दर्जेदार उत्पादने विक्रीसाठी बाजारात आणली.

कात्रजला  'अजितदादा पवार पुणे जिल्हा सहकारी दूध उत्पादक संघ कात्रज’

पुणे जिल्हा सहकारी दूध उत्पादक संघा (कात्रज) ला 'अजितदादा पवार पुणे जिल्हा सहकारी दूध उत्पादक संघ कात्रज’, असे नामकरण करण्याचा निर्णय संघाच्या संचालक मंडळाने सर्वानुमते घेतला आहे. अजित पवार यांच्या आकस्मिक निधनाने सहकार क्षेत्रात शोककळा पसरली असून, ही हानी सहकार चळवळीच्या दृष्टीने आणि पुणे जिल्ह्यातील दूध संघासाठी कधीही न भरून निघणारी असल्याची भावना संघाने व्यक्त केली आहे.