Ashadhi Wari 2025 : संत सोपानकाका पालखी सोहळ्याचा बारामती तालुक्यात प्रवेश

- सोमेश्वरनगर येथील काकडे महाविद्यालयाच्या प्रांगणात दुपारी ३ वाजता पाहिले अश्वरिंगण पार पडेल.

सोमेश्वरनगर : संत तुकाराम महाराज यांचे अभंग गात संत सोपानकाका महाराज पालखी सोहळ्याने बुधवार (दि.२५) सायंकाळी बारामती तालुक्यात प्रवेश केला. तालुक्याच्या सीमेवर निंबुत ग्रामस्थ, ग्रामपंचायत आणि प्रशासनाच्या वतीने भव्य स्वागत करण्यात आले. उद्या दि. २६ रोजी सोमेश्वरनगर येथील काकडे महाविद्यालयाच्या प्रांगणात दुपारी ३ वाजता पाहिले अश्वरिंगण पार पडेल.

पालखी सोहळ्याचे निंबुत येथे माजी बांधकाम सभापती प्रमोद काकडे, शेतकरी कृती समितीचे अध्यक्ष सतीश काकडे, ‘सोमेश्वर’चे माजी अध्यक्ष शहाजी काकडे यांच्या हस्ते रथाच्या बैलांचे पूजन करण्यात आले. सोहळाप्रमुख त्रिभुवन महाराज गोसावी यांचा ग्रामस्थांच्या वतीने सन्मान करण्यात आला. यावेळी सरपंच निर्मला काळे, उपसरपंच अमरसिंह काकडे, सदस्य नंदकुमार काकडे, मदन काकडे, सुमित काकडे, नायब तहसीलदार स्वाती गायकवाड, विस्तार अधिकारी राजेंद्र चांदगुडे, ग्रामसेवक चंद्रशेखर काळभोर व ग्रामस्थ उपस्थित होते.

निंबुत गावच्या सीमेपासून पालखी खांद्यावरून विठ्ठल मंदिरात नेण्यात आली. या ठिकाणी ग्रामस्थांच्या वतीने आरती करण्यात आली. पालखी दर्शनासाठी विठ्ठल मंदिरात ठेवण्यात आली होती. या ठिकाणी वारकऱ्यांनी राम कृष्ण हरीचा गजर केला. निंबुत ग्रामपंचायतीच्या वतीने पिण्याच्या पाण्याची सोय करण्यात आली होती. सतीशभैय्या कल्याणकारी संघाच्या वतीने रेनकोट, केळी, बिस्किटे वाटप करण्यात आले. होळ प्राथमिक आरोग्य केंद्राचे वैद्यकीय अधिकारी डॉ.ज्ञानदीप राजगे, डॉ.कर्णवीर शिंदे, डॉ.प्रज्ञा -खोमणे-नाझीरकर यांच्या मार्गदर्शनाखाली आरोग्य कर्मचाऱ्यांनी वारकऱ्यांसाठी मोफत औषधोपचार, पाणी शुद्धीकरण, तसेच परिसरातील हॉटेल तपासणी केली.

निंबुत, निंबुत छपरी, लक्ष्मीनगर, खंडोबाचीवाडी, गडदरवाडी, रासकरमाळ, फरांदेनगर परिसरातील भाविकांनी दर्शनासाठी गर्दी केली होती. रस्त्याच्या दुतर्फा रांगोळी काढण्यात आली होती. बा.सा. काकडे विद्यालयाच्या मुख्याध्यापिका दीपाली ननवरे यांच्या मार्गदर्शनाखाली विद्यार्थ्यांनी लेझीमच्या तालावर पालखी सोहळ्याचे स्वागत केले. सोहळ्यात शंभरहून अधिक दिंड्या आहेत. सतीश काकडे यांच्या वतीने निंबुत ते पंढरपूरच्या दरम्यान वारकऱ्यांसाठी मोफत रुग्णवाहिका उपलब्ध करून देण्यात आली आहे. वडगाव निंबाळकर पोलिस ठाण्याचे अधिकारी सचिन काळे, पोलिस उपनिरीक्षक राहुल साबळे आणि कर्मचाऱ्यांनी पालखीसाठी चोख बंदोबस्त ठेवला.