पुणे : उपमुख्यमंत्री अजित पवार यांचा बारामती विमान तळाजवळ अपघातात मृत्यू झाल्याची बातमी राज्यभरात वाऱ्यासारखी पसरली. दादा गेले ही बाब बारामतीकरांना समजताच संपूर्ण बारामती शोकसागरात बुडाल्याचे चित्र दिवसभर पाहायला मिळाले. या बातमीमुळे महाराष्ट्राच्या विविध कानाकोपऱ्यातून असंख्य कार्यकर्ते, समर्थक आणि चाहत्यांनी बारामतीकडे धाव घेतली. शहरात काहीकाळ तणावपूर्ण वातावरण निर्माण झाले होते. अजित पवार आपल्यात नाहीत ही बाब मान्य करायलाच बारामतीकर तयार नव्हते. दादांप्रती आपले प्रेम व्यक्त करण्यासाठी म्हणून संपूर्ण बारामती बंद ठेवण्यात आले होते.
बंदमुळे बाहेरून आलेल्या नागरिकांचे खाण्यापिण्याचे तसेच राहण्याचे मोठे हाल होत असल्याचे चित्र बुधवारी दिवसभर दिसून आले. अनेकजण रात्री उशिरापर्यंत शहरात अडकून पडले होते. अशा परिस्थितीत बारामतीतील व्यावसायिकांनी सामाजिक बांधिलकीचे दर्शन घडवले. काही हॉटेल चालक मदतीसाठी पुढे सरसावले. त्यांनी कोणताही व्यावसायिक विचार न करता रात्री मोफत जेवणाची व्यवस्था केली. यासोबतच आपल्या हॉटेलच्या परिसरात तसेच खोल्यांमध्ये मोफत राहण्याची सुविधाही उपलब्ध करून दिली.
“आज पैशांपेक्षा माणुसकी महत्त्वाची आहे,” अशी भावना व्यक्त करत या हॉटेल व्यावसायिकांनी आलेल्या प्रत्येकाची आपुलकीने विचारपूस केली. अनेक कार्यकर्त्यांनी या मदतीबद्दल कृतज्ञता व्यक्त केली. अन्न, पाणी आणि निवाऱ्याची व्यवस्था झाल्याने तणावपूर्ण वातावरणातही दिलासा मिळाल्याचे त्यांनी सांगितले. अजित पवार म्हणजे आमचे सर्वस्व आहे असे म्हणत बारामतीकरांनी दाखवलेली ही एकजूट आणि सामाजिक जाणीव कौतुकास्पद ठरली. कठीण प्रसंगी एकमेकांच्या मदतीला धावून जाणे हीच खरी बारामतीची ओळख असल्याचे या घटनेतून पुन्हा एकदा अधोरेखित झाले.
Web Summary : Following false news of Ajit Pawar's death, Baramati mourned. Businesses showed humanity by providing free food and shelter to stranded supporters, highlighting community spirit during the difficult time.
Web Summary : अजित पवार की मृत्यु की झूठी खबर के बाद, बारामती में शोक मनाया गया। कारोबारियों ने फंसे हुए समर्थकों को मुफ्त भोजन और आश्रय प्रदान करके मानवता दिखाई, जिससे मुश्किल समय में सामुदायिक भावना उजागर हुई।