HSC/12th Exam: बारावीत हिंदी पेपरलाही काॅपीचे ४ प्रकार उघड; नागपूर आणि लातूर विभागात प्रत्येकी २ प्रकरणे

पुणे, छत्रपती संभाजीनगर, मुंबई, कोल्हापूर, अमरावती, नाशिक आणि कोकण विभागात एकही प्रकरण आढळून आले नाही

पुणे : राज्यात इयत्ता बारावीची परीक्षा सुरू आहे. याच्या पहिल्याच दिवशी अर्थात मंगळवारी (दि. १०) राज्यात काॅपीची ४२ प्रकरणे आढळून आली हाेती. दुसऱ्या दिवशीही चार प्रकरणे उघड झाली आहेत, अशी माहिती राज्य माध्यमिक व उच्च माध्यमिक मंडळाने परिपत्रकाद्वारे दिली आहे. पहिला पेपर इंग्रजीचा, तर दुसरा पेपर हिंदीचा हाेता. आज, गुरुवारी भाषेचा पेपर आहे.

विद्यार्थ्यांना काॅपीमुक्त आणि तणावमुक्त पेपर देता यावा म्हणून राज्य दक्षता समिती, जिल्हा दक्षता समितीने आवश्यक उपाययाेजना केल्या आहेत. या कडक तपासणीमुळे पहिल्या दिवशी ४२ प्रकरणे आणि दुसऱ्या दिवशी ४ प्रकरणे उघड झाली. बुधवारी सकाळच्या सत्रात हिंदी विषयाचा आणि दुपारच्या सत्रात जर्मन, जपानी, चिनी, पर्शियन विषयाचा पेपर घेण्यात आला. यात विभागवार चित्र पाहता नागपूर आणि लातूर या दाेन विभागात प्रत्येकी दाेन काॅपी प्रकरणे आढळून आली. पुणे, छत्रपती संभाजीनगर, मुंबई, कोल्हापूर, अमरावती, नाशिक आणि कोकण विभागात एकही प्रकरण आढळून आले नाही.