लोकमत न्यूज नेटवर्क
पुणे : भ्रष्टाचारविरोधी गांधीगिरी जन आंदोलनाचा सदस्य असल्याचे सांगून जनहित याचिका दाखल करून बांधकाम व्यावसायिकांकडे खंडणी मागणारी टोळी समोर आली आहे. बांधकाम व्यावसायिकाविरुद्ध जनहित याचिका दाखल करून ती मागे घेण्यासाठी १ कोटी रुपयांची खंडणी मागितल्याप्रकरणी खंडणीविरोधी पथकाने राजेश बजाज याच्यासह चौघांविरुद्ध गुन्हा दाखल केला आहे.
राजेश ऊर्फ बॉबी खैरातीलाल बजाज ऊर्फ सचदेव (रा. अंकुर कमला नेहरू पार्कसमोर, डेक्कन जिमखाना), के. ए. कुरेशी (रा. मलकाजी वाडा, खडकी बाजार), अशोक शंकरराव जाधव (रा. राजा बंगलो, खराडी) आणि बापू गोरख शिंदे (रा. नऱ्र्हेगाव) अशी गुन्हा दाखल केलेल्यांची नावे आहेत. हा प्रकार एप्रिल २०१५ ते २४ जुलै २०१९ दरम्यान शिवाजीनगर कोर्ट गेट नं. ३च्या समोर रोडवर घडला आहे.
याप्रकरणी निखिल केतन गोखले (वय ४७, रा. मयूर कॉलनी, कोथरूड) यांनी फिर्याद दिली आहे. गोखले यांची शशिबिंदू कन्स्ट्रक्शन कंपनी आहे. त्यांच्या कंपनीचे बोपोडी येथील बांधकामाची परवानगी चुकीची आहे, याबाबत राजेश बजाज व इतरांनी मुंबई हायकोर्टात दिवाणी अर्ज केला होता. त्या वेळी तिघांनी १४ सप्टेंबर २०१६ रोजी प्रतिज्ञापत्र सादर केले. या प्रतिज्ञापत्रात तिघांनी २० ते ३० ऑगस्टपर्यंत राजेश बजाज यांना डेंग्यू झाला व त्यांना बेड रेस्ट घेण्यास डॉक्टरांनी सांगितले. तसेच के. ए.. कुरेशी यांना व्हायरल संक्रमण झाले असल्याने सुनावणीच्या वेळी हजर राहू शकले नसल्याचे नमूद केले. त्या तिघांनी सादर केलेले मेडिकल प्रमाणपत्र हे बनावट करून दाखल केल्यामुळे कंपनीची व कोर्टाची फसवणूक केली आहे. तसेच हायकोर्टात जनहित याचिकेची फेरसुनावणी करण्याकरिता केलेल अर्ज मागे घेणेकरिता ऑगस्ट २०१८ मध्ये शिवाजीनगर कोर्ट गेट नं. ३ च्या समोर रोडवर त्यांनी १ कोटी रुपयांची मागणी करून, शिवीगाळ करून कंपनीसह फिर्यादी व फिर्यादीच्या कंपनीचे डायरेक्टर यांना संपवेन अशी धमकी दिली होती.
या चौघांनी आम्हाला जिवे मारण्याची व कंपनीच्या कामकाजामध्ये अडथळे निर्माण करण्याची धमकी देऊन आमच्या विरोधात विनाकारण न्यायालयात अर्ज करीत होते. त्या भीतीपोटी आम्ही तक्रार दिलेली नव्हती. परंतु, त्यांच्याविरुद्ध गुन्हा दाखल झाल्याबाबत वर्तमान पत्रामधून समजल्याने आम्ही त्याने दिलेल्या त्रासाबाबत त्यांच्याविरुद्ध तक्रार देण्यासाठी आलो असल्याचे गोखले यांनी आपल्या फिर्यादीत म्हटले आहे. गोखले यांच्या फिर्यादीनुसार राजेश बजाज याच्यासह चौघांविरुद्ध शिवाजीनगर पोलीस ठाण्यात गुन्हा दाखल केला आहे.
* दोन दिवसांपूर्वी प्रसिद्ध बांधकाम व्यावसायिक रवींद्र नौपतलाल सांकला यांना ५० लाखांची खंडणी मागून जबरदस्तीने फ्लॅट बळकाविल्याप्रकरणी शिवाजीनगर पोलीस ठाण्यात राजेश बजाज व इतरांवर गुन्हा दाखल करण्यात आला होता.
* राजेश बजाज याने अनेकांची यापूर्वी बनावट कागदपत्रांद्वारे फसवणूक केली आहे. प्रसिद्ध बांधकाम व्यावसायिक अविनाश भोसले यांनी राजेश बजाज याच्याविरुद्ध १०० कोटी रुपयांचा बदनामीचा दावा दाखल केला आहे.
* बांधकाम व्यावसायिक आदित्य दाढे यांची फसवणूक केल्याप्रकरणी गुन्हे शाखेने राजेश बजाज याला यापूर्वी अटक केली होती.